2025 ലെ ഏഷ്യാ കപ്പ് അനിശ്ചിതത്വത്തിൽ; ബംഗ്ലാദേശിൽ നടക്കുന്ന യോഗത്തിൽ പങ്കെടുക്കാൻ ഇന്ത്യ വിസമ്മതിച്ചു
മുംബൈ: ധാക്കയിൽ നടക്കുന്ന ഏഷ്യൻ ക്രിക്കറ്റ് കൗൺസിൽ യോഗം ബിസിസിഐ ബഹിഷ്‌കരിച്ചു. ജൂലൈ 24 ന് ധാക്കയിൽ നടക്കാനിരിക്കുന്ന ഏഷ്യൻ ക്രിക്കറ്റ് കൗൺസിലിന്റെ (എസിസി) വാർഷിക പൊതുയോഗം ബഹിഷ്‌കരിക്കുമെന്ന് ഇന്ത്യൻ ക്രിക്കറ്റ് കൺട്രോൾ ബോർഡ് പ്രഖ്യാപിച്ചു. ബംഗ്ലാദേശിലെ നിലവിലെ രാഷ്ട്രീയ സാഹചര്യം കാരണം വേദി മാറ്റണമെന്ന് ബിസിസിഐ പലതവണ അഭ്യർത്ഥിച്ചിരുന്നു.
എന്നാൽ ചെയർമാൻ മൊഹ്‌സിൻ നഖ്‌വിയുടെ നേതൃത്വത്തിലുള്ള ഏഷ്യൻ ക്രിക്കറ്റ് കൗൺസിൽ (എസിസി) ബിസിസിഐയുടെ അഭ്യർത്ഥനയോട് ഇതുവരെ പ്രതികരിച്ചിട്ടില്ല. ഇതിനെത്തുടർന്ന് ബിസിസിഐ യോഗം ബഹിഷ്‌കരിക്കുമെന്ന് പ്രഖ്യാപിച്ചു.
യോഗം ധാക്കയിൽ നടന്നാൽ തങ്ങളുടെ സാന്നിധ്യമില്ലാതെ എടുക്കുന്ന ഒരു തീരുമാനവും അംഗീകരിക്കില്ലെന്ന് ബിസിസിഐയും വ്യക്തമാക്കി. ഇന്ത്യയും പാകിസ്ഥാനും ഉൾപ്പെടെ ആറ് രാജ്യങ്ങൾ പങ്കെടുക്കുന്ന ഏഷ്യാ കപ്പ് ട്വന്റി20 ടൂർണമെന്റിനെ ബിസിസിഐ ബഹിഷ്‌കരിക്കുന്നത് ബാധിക്കുമെന്ന് റിപ്പോർട്ടുകൾ സൂചിപ്പിക്കുന്നു.
അവസാന ഏഷ്യാ കപ്പ് 2023 ൽ ശ്രീലങ്കയിൽ നടന്നു. ടൂർണമെന്റിലെ നിലവിലെ ചാമ്പ്യന്മാരാണ് ഇന്ത്യ. നിലവിലെ സംഘർഷങ്ങൾ കണക്കിലെടുത്ത് കൗൺസിൽ യോഗത്തിന്റെയും ഏഷ്യാ കപ്പിന്റെയും വേദി മാറുമെന്ന് സൂചനയുണ്ട്. സെപ്റ്റംബർ 5 മുതൽ 21 വരെയാണ് ടൂർണമെന്റ് നിശ്ചയിച്ചിരിക്കുന്നത്.
ധാക്കയിൽ യോഗം നടത്തണമെന്ന എസിസി ചെയർമാൻ മൊഹ്‌സിൻ നഖ്‌വിയുടെ നിർബന്ധം അനാവശ്യമാണെന്നും കൗൺസിൽ യോഗം ധാക്കയിൽ നിന്ന് മാറ്റിയാൽ മാത്രമേ ഏഷ്യാ കപ്പ് നടത്തുകയുള്ളൂവെന്നും ബിസിസിഐ വ്യക്തമാക്കി. പാകിസ്ഥാനുമായുള്ള അതിർത്തി സംഘർഷം കാരണം ഇന്ത്യ എമേർജിംഗ് വനിതാ ഏഷ്യാ കപ്പ് ബഹിഷ്‌കരിക്കാൻ സാധ്യതയുണ്ടെന്ന റിപ്പോർട്ടുകൾക്കിടെയാണ് ബിസിസിഐയുടെ തീരുമാനം.
