ദക്ഷിണ കൊറിയ സൈനിക നിയമം പിൻവലിച്ചു, പ്രസിഡൻ്റിനെ ഇംപീച്ച് ചെയ്യാനുള്ള നീക്കം
സോൾ: രാജ്യത്ത് പട്ടാള നിയമം പ്രഖ്യാപിച്ച പ്രസിഡൻ്റ് യൂൻ സുക് യോളിനെതിരെ പ്രതിപക്ഷ പാർട്ടികൾ ഇംപീച്ച്മെൻ്റ് പ്രമേയം ആരംഭിച്ചു. ചൊവ്വാഴ്ച രാത്രി ദേശീയ ടെലിവിഷനിൽ യൂൻ പട്ടാള നിയമം പ്രഖ്യാപിച്ചു. ഇതോടെ എല്ലാ രാഷ്ട്രീയ പ്രവർത്തനങ്ങളും സൈന്യം നിരോധിച്ചു. എന്നാൽ സമ്മർദം ഉയർന്നതോടെ യൂൻ ആറ് മണിക്കൂറിനുള്ളിൽ നിയമം പിൻവലിച്ചു.
പ്രതിപക്ഷ പാർട്ടികൾ ഉത്തരകൊറിയയോട് അനുഭാവം പുലർത്തുന്നുവെന്നും ഭരണത്തെ തുരങ്കം വയ്ക്കാൻ ശ്രമിക്കുന്നുവെന്നും ആരോപിച്ചാണ് യൂൻ പട്ടാള നിയമം ഏർപ്പെടുത്തിയത്. തുടർന്ന് രാജ്യത്ത് ശക്തമായ പ്രതിഷേധം ഉയർന്നിരുന്നു. യൂണിൻ്റെ രാജി ആവശ്യപ്പെട്ട് വിദ്യാർത്ഥികൾ ഉൾപ്പെടെയുള്ള പ്രതിഷേധക്കാർ തെരുവിലിറങ്ങി. പോലീസും പ്രതിഷേധക്കാരും ഏറ്റുമുട്ടി. രണ്ട് മണിക്കൂറിനുള്ളിൽ പ്രതിപക്ഷ എംപിമാർ നിയമം നിരോധിക്കുന്ന പ്രമേയം പാർലമെൻ്റിൽ പാസാക്കി. നിയമം അസാധുവാണെന്ന് സ്പീക്കർ പ്രഖ്യാപിച്ചു.
അറിയിക്കാതെ യൂണിൻ്റെ പ്രഖ്യാപനം ഭരണപക്ഷത്തെയും ചൊടിപ്പിച്ചു. ഇതോടെ നിയമം പിൻവലിക്കാനും പാർലമെൻ്റ് വളഞ്ഞ സൈന്യത്തെ പിൻവലിക്കാനും യൂൺ നിർബന്ധിതനായി. അതേസമയം, യൂണിൻ്റെ രാജി ആവശ്യപ്പെട്ട് കൊറിയൻ കോൺഫെഡറേഷൻ ഓഫ് ട്രേഡ് യൂണിയൻസ് പ്രതിഷേധം ആരംഭിച്ചു. സൈനിക നിയമം പ്രഖ്യാപിച്ചതിൻ്റെ പൂർണ ഉത്തരവാദിത്തം ഏറ്റെടുത്ത് പ്രതിരോധ മന്ത്രി കിം യോങ്-ഹ്യുനും മറ്റ് മുതിർന്ന ഉദ്യോഗസ്ഥരും രാജി സന്നദ്ധത അറിയിച്ചു.
യൂൻ പുറത്ത് പോവുകയാണോ?
300 അംഗ പാർലമെൻ്റിൽ (നാഷണൽ അസംബ്ലി) പ്രധാന പ്രതിപക്ഷമായ ഡെമോക്രാറ്റിക് പാർട്ടിക്ക് ഭൂരിപക്ഷമുണ്ട് (170). യൂണിൻ്റെ പീപ്പിൾസ് പവർ പാർട്ടിക്ക് 108. മറ്റ് അഞ്ച് പാർട്ടികൾ ഒന്നിക്കുമ്പോൾ പ്രതിപക്ഷത്തിന് ആകെ 192 എംപിമാരാണുള്ളത്. മൂന്നിൽ രണ്ട് എംപിമാരുടെ പിന്തുണയുണ്ടെങ്കിൽ മാത്രമേ പ്രസിഡൻ്റിനെ ഇംപീച്ച് ചെയ്യാൻ കഴിയൂ. പാർലമെൻ്റിൽ അവതരിപ്പിച്ച ഇംപീച്ച്മെൻ്റ് ബില്ലിന്മേലുള്ള വോട്ടെടുപ്പ് 72 മണിക്കൂറിനുള്ളിൽ പ്രതീക്ഷിക്കാം.
എന്തിനാണ് പട്ടാള നിയമം?
(യൂണിൻ്റെ വാദങ്ങൾ)
1. പ്രതിപക്ഷത്തിന് ഉത്തരകൊറിയയോട് അനുഭാവമുണ്ട്. ദേശവിരുദ്ധ നീക്കങ്ങളിലൂടെ സർക്കാരിനെ പ്രതിസന്ധിയിലേക്ക് തള്ളിവിടുകയാണ്. പാർലമെൻ്റ് നടപടികൾ തടസ്സപ്പെട്ടു.
2. ഉത്തരകൊറിയൻ കമ്യൂണിസ്റ്റ് ശക്തികളുടെ ഭീഷണിയിൽ നിന്ന് രാജ്യത്തെ സംരക്ഷിക്കണം. ഉത്തരകൊറിയൻ അനുകൂലികളെ ഉന്മൂലനം ചെയ്യണം
3. ഭരണഘടനാ ക്രമസമാധാന പാലനം വേണം
\
\