100 ദിവസത്തെ യുദ്ധം: പുതിയ ആക്രമണങ്ങൾ, ഇറാന്റെ തിരിച്ചടി; ട്രംപ്-ഖമേനി ചർച്ചകൾക്ക് സാധ്യത മങ്ങുന്നു

ടെഹ്റാൻ/വാഷിങ്ടൺ: അമേരിക്കയും ഇറാനും തമ്മിലുള്ള യുദ്ധം 100 ദിവസം പിന്നിടുമ്പോഴും സംഘർഷം അവസാനിക്കാനുള്ള സൂചനകളില്ല. കഴിഞ്ഞ ദിവസങ്ങളിലും ഇരു രാജ്യങ്ങളും പരസ്പരം ആക്രമണം തുടരുകയും, പശ്ചിമേഷ്യയിൽ സുരക്ഷാ ആശങ്കകൾ കൂടുതൽ രൂക്ഷമാവുകയും ചെയ്തു. 

ഏറ്റവും പുതിയ സംഭവവികാസങ്ങളിൽ, ഹോർമുസ് കടലിടുക്കിന് സമീപം ഇറാൻ വിന്യസിച്ച ഡ്രോണുകൾ അമേരിക്ക വെടിവെച്ചിട്ടതിനെ തുടർന്ന് ഇറാൻ കുവൈത്തിനും ബഹ്റൈനും നേരെ ബാലിസ്റ്റിക് മിസൈലുകൾ പ്രയോഗിച്ചു. ഭൂരിഭാഗം മിസൈലുകളും പ്രതിരോധ സംവിധാനങ്ങൾ തടഞ്ഞെങ്കിലും മേഖലയിൽ വീണ്ടും യുദ്ധഭീതി ഉയർന്നു. മറുപടിയായി ഇറാന്റെ തീരദേശ റഡാർ കേന്ദ്രങ്ങൾ അമേരിക്ക ആക്രമിച്ചതായും റിപ്പോർട്ടുകളുണ്ട്. 

അതേസമയം, സമാധാന ചർച്ചകൾ മുന്നോട്ടുകൊണ്ടുപോകാനുള്ള ശ്രമങ്ങൾ തുടരുന്നുണ്ടെങ്കിലും കാര്യമായ പുരോഗതി ഉണ്ടായിട്ടില്ല. യുദ്ധം അവസാനിപ്പിക്കുന്നതിന് ഉപരോധങ്ങളിൽ ഇളവും വിദേശ ബാങ്കുകളിലെ ഇറാന്റെ മരവിപ്പിച്ചിട്ടുള്ള ഏകദേശം 24 ബില്യൺ ഡോളർ ആസ്തികൾ വിട്ടുനൽകണമെന്നുമാണ് ടെഹ്റാന്റെ ആവശ്യം. എന്നാൽ ഈ ആവശ്യങ്ങളിൽ അമേരിക്ക ഇതുവരെ അനുകൂല നിലപാട് സ്വീകരിച്ചിട്ടില്ല. 

അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനുമായി ധാരണയിലെത്താൻ ആഗ്രഹം പ്രകടിപ്പിച്ചിട്ടുണ്ടെങ്കിലും, ഇറാന്റെ പരമോന്നത നേതാവായ മൊജ്തബ ഖമേനിയുമായി നേരിട്ടുള്ള കൂടിക്കാഴ്ചയ്ക്ക് സാധ്യതയില്ലെന്ന സൂചനയാണ് ഇറാന്റെ വിദേശകാര്യമന്ത്രി അബ്ബാസ് അറാഘ്ചി നൽകിയത്. "യാഥാർഥ്യ ലോകത്ത് ജീവിക്കണം" എന്നായിരുന്നു ട്രംപിന്റെ പരാമർശങ്ങളോടുള്ള അദ്ദേഹത്തിന്റെ പ്രതികരണം. 

യുദ്ധത്തിന്റെ സാമ്പത്തിക പ്രത്യാഘാതങ്ങളും ഗുരുതരമാണ്. ഇറാനിൽ വിലക്കയറ്റം കുതിച്ചുയരുകയും ഭക്ഷ്യവസ്തുക്കളുടെ വില പലമടങ്ങ് വർധിക്കുകയും ചെയ്തിട്ടുണ്ട്. വൈദ്യുതി ക്ഷാമം, തൊഴിലില്ലായ്മ, സാമൂഹിക അസ്വസ്ഥത എന്നിവയും രാജ്യത്തെ പ്രതിസന്ധിയിലാഴ്ത്തുന്നുവെന്ന് റിപ്പോർട്ടുകൾ വ്യക്തമാക്കുന്നു. 

ഫെബ്രുവരി അവസാനത്തോടെ ആരംഭിച്ച ഈ യുദ്ധം ഇതിനോടകം പശ്ചിമേഷ്യയിലെ നിരവധി രാജ്യങ്ങളിലേക്ക് വ്യാപിച്ചിരിക്കുകയാണ്. കുവൈത്ത്, ബഹ്റൈൻ, സൗദി അറേബ്യ, ഖത്തർ, യുഎഇ തുടങ്ങിയ രാജ്യങ്ങൾക്കും ആക്രമണ ഭീഷണിയും നാശനഷ്ടങ്ങളും നേരിട്ടതായി റിപ്പോർട്ടുകളുണ്ട്. ഹോർമുസ് കടലിടുക്കിലെ സംഘർഷം ആഗോള എണ്ണവിപണിയെയും ബാധിച്ചിരിക്കുകയാണ്. 

100 ദിവസം പിന്നിടുമ്പോഴും യുദ്ധം അവസാനിപ്പിക്കാൻ വ്യക്തമായ രാഷ്ട്രീയ ധാരണ രൂപപ്പെടാത്ത സാഹചര്യത്തിൽ പശ്ചിമേഷ്യയിലെ അനിശ്ചിതത്വം തുടരുമെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ.