നടിയെ ആക്രമിച്ച കേസ്: മെമ്മറി കാർഡും പെൻഡ്രൈവും ഹാജരാക്കാൻ ഹൈക്കോടതി നിർദേശം

കൊച്ചി: 2017-ലെ നടിയെ ആക്രമിച്ച കേസിലെ നിർണായക തെളിവുകളായ മെമ്മറി കാർഡിന്റെയും പെൻഡ്രൈവിന്റെയും സുരക്ഷയും അനധികൃത ആക്സസ് ആരോപണങ്ങളും സംബന്ധിച്ച ഹർജിയിൽ, ബന്ധപ്പെട്ട ഡിജിറ്റൽ തെളിവുകൾ കോടതിയിൽ ഹാജരാക്കാൻ കേരള ഹൈക്കോടതി നിർദേശം നൽകി. കേസിലെ തെളിവുകളുടെ സംരക്ഷണവും അവയുടെ കൈകാര്യം ചെയ്യലും സംബന്ധിച്ച് ഉയർന്ന ഗുരുതര ആരോപണങ്ങളുടെ പശ്ചാത്തലത്തിലാണ് ഹൈക്കോടതിയുടെ ഇടപെടൽ. 

നടിയെ ആക്രമിച്ച സംഭവത്തിന്റെ ദൃശ്യങ്ങൾ ഉൾക്കൊള്ളുന്ന മെമ്മറി കാർഡ് കോടതി കസ്റ്റഡിയിലിരിക്കെ അനധികൃതമായി പലതവണ തുറന്നതായി നേരത്തെ കണ്ടെത്തിയിരുന്നു. ഈ സാഹചര്യത്തിൽ തെളിവുകളുടെ വിശ്വാസ്യതയും സ്വകാര്യതയും സംബന്ധിച്ച് ഗുരുതര ആശങ്കകൾ ഉയർന്നിരുന്നു. 

മെമ്മറി കാർഡിലേക്കുള്ള അനധികൃത പ്രവേശനവുമായി ബന്ധപ്പെട്ട അന്വേഷണം തൃപ്തികരമല്ലെന്നും സമഗ്രവും സ്വതന്ത്രവുമായ പുതിയ അന്വേഷണം വേണമെന്നുമാണ് അതിജീവിത ഹൈക്കോടതിയെ സമീപിച്ചിരിക്കുന്നത്. മെമ്മറി കാർഡിന്റെ ഉള്ളടക്കം പകർത്തിയ പെൻഡ്രൈവും കേസിൽ പ്രധാന തെളിവായാണ് പരിഗണിക്കപ്പെടുന്നത്. 

ഡിജിറ്റൽ തെളിവുകളുടെ സുരക്ഷയും സ്വകാര്യതയും ഉറപ്പാക്കേണ്ടത് നീതിന്യായ വ്യവസ്ഥയുടെ പ്രധാന ഉത്തരവാദിത്വമാണെന്ന് നേരത്തെ കോടതി നിരീക്ഷിച്ചിരുന്നു. അതിനാൽ തന്നെ മെമ്മറി കാർഡും പെൻഡ്രൈവും സംബന്ധിച്ച എല്ലാ വിവരങ്ങളും വിശദമായി പരിശോധിക്കേണ്ടതുണ്ടെന്നാണ് നിയമവൃത്തങ്ങൾ വിലയിരുത്തുന്നത്. 

അതേസമയം, മെമ്മറി കാർഡിലേക്കുള്ള അനധികൃത പ്രവേശനം സംബന്ധിച്ച ഹർജികളിൽ തുടർച്ചയായി രണ്ട് ഹൈക്കോടതി ജഡ്ജിമാർ പിന്മാറിയതും കേസ് വീണ്ടും ശ്രദ്ധാകേന്ദ്രമാക്കിയിട്ടുണ്ട്. പുതിയ ബെഞ്ച് വിഷയം പരിഗണിക്കുന്നതിനുള്ള നടപടികൾ പുരോഗമിക്കുകയാണ്.