അഫാനെ സൽമാ ബീവിയുടെ വീട്ടിലേക്ക് കൊണ്ടുവന്നു; കനത്ത സുരക്ഷയിൽ തെളിവെടുപ്പ്

തിരുവനന്തപുരം: സംസ്ഥാനത്തെ നടുക്കിയ വെഞ്ഞാറമൂട് കൂട്ടക്കൊലക്കേസിലെ പ്രതി അഫാനെ തെളിവെടുപ്പിനായി പാങ്ങോടേക്ക് കൊണ്ടുവന്നു. ആറ്റിങ്ങൽ ഡിവൈഎസ്പിയുടെ നേതൃത്വത്തിൽ പോലീസ് സംഘം എത്തി. അഫാനെ മുത്തശ്ശി സൽമാ ബീവി കൊല്ലപ്പെട്ട വീട്ടിലേക്ക് കൊണ്ടുവന്ന് തെളിവെടുപ്പ് നടത്തി. സ്ഥലത്ത് കനത്ത സുരക്ഷ ഏർപ്പെടുത്തി. അഫാനെ ചുറ്റിക വാങ്ങിയ കടയിലേക്കും കൊണ്ടുപോകും.

അതേസമയം, അഭിഭാഷകൻ കെ ഉവൈസ് ഖാൻ അഫാന്റെ നിയമ പ്രാതിനിധ്യത്തിൽ നിന്ന് പിന്മാറി. കേസ് ഏറ്റെടുക്കുന്ന ആര്യനാട് ബ്ലോക്ക് കോൺഗ്രസ് പ്രസിഡന്റ് ഉവൈസ് ഖാനെതിരെ കെപിസിസിക്ക് പരാതി ലഭിച്ചിരുന്നു. കേസിൽ ഉവൈസിനെ ഹാജരാകുന്നതിൽ നിന്ന് വിലക്കണമെന്ന് ആവശ്യപ്പെട്ട് യൂത്ത് കോൺഗ്രസ് തിരുവനന്തപുരം വൈസ് പ്രസിഡന്റ് സൈതാലിയാണ് പരാതി നൽകിയത്. ഉവൈസിന്റെ നടപടി കോൺഗ്രസിന് അപമാനം വരുത്തിവെച്ചതായി കാട്ടി കെപിസിസി പ്രസിഡന്റിന് പരാതി നൽകി.

നെടുമങ്ങാട് കോടതിയിലെ ബാർ അസോസിയേഷന്റെ പ്രസിഡന്റ് കൂടിയാണ് ഉവൈസ് ഖാൻ. ജില്ലാ ജഡ്ജി അധ്യക്ഷനായ ലീഗൽ സർവീസസ് അതോറിറ്റിയുടെ നിർദ്ദേശപ്രകാരമാണ് അഫാനു വേണ്ടി ഹാജരായതെന്ന് ഉവൈസിന്റെ വിശദീകരണം. അഫാന് വേണ്ടി ഹാജരാകാൻ അഭിഭാഷകരില്ലാത്തതിനാൽ ലീഗൽ സർവീസസ് അതോറിറ്റി തന്നെയാണ് അഭിഭാഷകരെ നൽകുന്നത്. അഭിഭാഷകരില്ലാത്തവർക്ക് അഭിഭാഷകരെ നൽകുന്നത് നിയമ സേവന അതോറിറ്റി തന്നെയാണ്.

സൽമാ ബീവി വധക്കേസിലെ പ്രതിയെ ഇന്നലെ മൂന്ന് ദിവസത്തേക്ക് പാങ്ങോട് പോലീസ് കസ്റ്റഡിയിലെടുത്തു. കസ്റ്റഡി അപേക്ഷയെ തുടർന്ന് പൂജപ്പുര സെൻട്രൽ ജയിലിലായിരുന്ന പ്രതിയെ ഇന്നലെ രാവിലെ 11 മണിക്ക് നെടുമങ്ങാട് കോടതിയിൽ എത്തിച്ചു. കോടതി നടപടികൾക്ക് ശേഷം ഉച്ചയ്ക്ക് 12 മണിയോടെ പ്രതിയെ കസ്റ്റഡിയിലെടുത്ത് പാങ്ങോട് പോലീസ് സ്റ്റേഷനിലേക്ക് കൊണ്ടുപോയി. ആറ്റിങ്ങൽ ഡിവൈഎസ്പിയുടെ നേതൃത്വത്തിൽ രാത്രി വൈകിയും ചോദ്യം ചെയ്തു.