ചന്ദ്രനെ പഠിക്കാൻ ഇനി കൃത്രിമബുദ്ധിയും; നാസ–ഐബിഎമ്മിന്റെ പുതിയ നീക്കം
ചന്ദ്രന്റെ രഹസ്യങ്ങൾ കൂടുതൽ വേഗത്തിൽ കണ്ടെത്താൻ കൃത്രിമബുദ്ധിയുടെ സഹായം തേടി നാസയും ഐബിഎമ്മും. ചന്ദ്രനെക്കുറിച്ചുള്ള ശാസ്ത്രീയ വിവരങ്ങൾ വിശകലനം ചെയ്യുന്നതിനായി ഇരുസ്ഥാപനങ്ങളും ചേർന്ന് പുതിയ ‘ലൂണാർ ഫൗണ്ടേഷൻ മോഡൽ’ പുറത്തിറക്കി. ചന്ദ്രന്റെ ഉപരിതലവുമായി ബന്ധപ്പെട്ട വലിയ തോതിലുള്ള വിവരങ്ങൾ വേഗത്തിൽ പരിശോധിക്കാനും ഗവേഷകർക്ക് ആവശ്യമായ സവിശേഷതകൾ തിരിച്ചറിയാനും സഹായിക്കുന്ന തുറന്ന സംവിധാനമാണിത്.
നാസയുടെ ലൂണാർ റെക്കണൈസൻസ് ഓർബിറ്റർ ഉൾപ്പെടെ വിവിധ ചാന്ദ്ര ദൗത്യങ്ങളിൽ നിന്നുള്ള വിവരങ്ങളാണ് പുതിയ കൃത്രിമബുദ്ധി മാതൃക പരിശീലിപ്പിക്കാൻ ഉപയോഗിച്ചിരിക്കുന്നത്. ചന്ദ്രന്റെ ഉപരിതലത്തിലെ ഗർത്തങ്ങൾ, അഗ്നിപർവത സവിശേഷതകൾ, മഞ്ഞിന്റെ സാന്നിധ്യവുമായി ബന്ധപ്പെട്ട മേഖലകൾ തുടങ്ങിയവ തിരിച്ചറിയുന്നതിൽ ഇത് ഗവേഷകരെ സഹായിക്കുമെന്നാണ് വിലയിരുത്തൽ. നിലവിലുള്ള ചില രീതികളേക്കാൾ മികച്ച കൃത്യതയും പരീക്ഷണങ്ങളിൽ പുതിയ മാതൃക പ്രകടിപ്പിച്ചിട്ടുണ്ട്.
ചന്ദ്രന്റെ ധ്രുവപ്രദേശങ്ങളിലെ മഞ്ഞ് നിക്ഷേപങ്ങൾ കണ്ടെത്തുന്നതിന് ഈ സാങ്കേതികവിദ്യയ്ക്ക് പ്രത്യേക പ്രാധാന്യമുണ്ട്. ഭാവിയിലെ മനുഷ്യ ചാന്ദ്രദൗത്യങ്ങൾക്ക് വെള്ളവും ഓക്സിജനും പോലുള്ള വിഭവങ്ങൾ എവിടെ ലഭ്യമാകുമെന്നറിയുന്നത് നിർണായകമാണ്. സുരക്ഷിതമായ ലാൻഡിങ് മേഖലകൾ കണ്ടെത്താനും ചന്ദ്രന്റെ ഭൂപ്രകൃതി കൂടുതൽ വിശദമായി മനസ്സിലാക്കാനും കൃത്രിമബുദ്ധിയുടെ സഹായം ഉപയോഗിക്കാനാകും.
വർഷങ്ങളായി ശേഖരിച്ച ചാന്ദ്രവിവരങ്ങൾ മനുഷ്യർ മാത്രം പരിശോധിക്കുന്നതിന് പകരം കൃത്രിമബുദ്ധിയുടെ സഹായത്തോടെ വളരെ വേഗത്തിൽ വിശകലനം ചെയ്യാൻ കഴിയുന്നതാണ് പുതിയ സംവിധാനത്തിന്റെ പ്രധാന പ്രത്യേകത. ശാസ്ത്രജ്ഞർക്ക് പുതിയ കണ്ടെത്തലുകളിലേക്ക് കൂടുതൽ വേഗത്തിൽ എത്തിച്ചേരാനും ഗവേഷണപ്രവർത്തനങ്ങളുടെ സമയം കുറയ്ക്കാനും ഇതിലൂടെ സാധിക്കുമെന്നാണ് പ്രതീക്ഷ.
ചന്ദ്രനിൽ മനുഷ്യ സാന്നിധ്യം കൂടുതൽ ശക്തമാക്കാനുള്ള ഭാവി പദ്ധതികൾക്കിടെയാണ് നാസ–ഐബിഎം കൂട്ടുകെട്ടിന്റെ പുതിയ നീക്കം. ചന്ദ്രനിലെ വിഭവങ്ങൾ കണ്ടെത്തുന്നതിൽ നിന്ന് സുരക്ഷിതമായ ലാൻഡിങ് മേഖലകൾ തിരഞ്ഞെടുക്കുന്നതുവരെ കൃത്രിമബുദ്ധി സഹായകമാകുമെന്നതിനാൽ, ബഹിരാകാശ ഗവേഷണത്തിന്റെ അടുത്ത ഘട്ടത്തിൽ ഇത്തരം സാങ്കേതികവിദ്യകൾക്ക് നിർണായക പങ്കുണ്ടാകുമെന്നാണ് ശാസ്ത്രലോകത്തിന്റെ പ്രതീക്ഷ.
