‘വെടിനിർത്തൽ മാത്രം സാധ്യമല്ല’; യുക്രൈൻ യുദ്ധം അവസാനിപ്പിക്കാൻ ആവശ്യങ്ങൾ ആവർത്തിച്ച് റഷ്യ

മോസ്‌കോ: യുക്രൈൻ യുദ്ധം താൽക്കാലികമായി മരവിപ്പിക്കുന്ന തരത്തിലുള്ള വെടിനിർത്തൽ അംഗീകരിക്കാനാകില്ലെന്ന് റഷ്യ. യുദ്ധത്തിന്റെ അടിസ്ഥാന കാരണങ്ങൾ പരിഹരിച്ചുകൊണ്ടുള്ള സമഗ്രമായ സമാധാന കരാറാണ് ആവശ്യമെന്നാണ് റഷ്യയുടെ നിലപാട്. 

യുദ്ധം താൽക്കാലികമായി ‘ഫ്രീസ്’ ചെയ്യുന്നത് നിലവിലെ സംഘർഷരേഖ മാത്രം നിലനിർത്തുന്ന സാഹചര്യമാകുമെന്നാണ് റഷ്യ ചൂണ്ടിക്കാട്ടുന്നത്. റഷ്യയുടെ പ്രധാന ആവശ്യങ്ങൾ പരിഹരിക്കാതെ വെടിനിർത്തൽ നടപ്പാക്കുന്നത് അംഗീകരിക്കില്ലെന്നാണ് ക്രെംലിൻ വ്യക്തമാക്കുന്നത്.

യുക്രൈന്റെ നാറ്റോ അംഗത്വവുമായി ബന്ധപ്പെട്ട നിലപാട്, റഷ്യ നിയന്ത്രിക്കുന്ന പ്രദേശങ്ങളുടെ ഭാവി തുടങ്ങിയ വിഷയങ്ങൾ റഷ്യ മുന്നോട്ടുവയ്ക്കുന്ന പ്രധാന ആവശ്യങ്ങളിൽ ഉൾപ്പെടുന്നു. റഷ്യയുടെ നിലപാട് പ്രകാരം ലക്ഷ്യങ്ങൾ കൈവരിക്കുന്നതുവരെ സൈനിക നടപടികൾ തുടരാനുള്ള സാധ്യതയും നിലനിൽക്കുന്നു. 

അതേസമയം, യുദ്ധം തുടരുന്നതിനിടെ ഇരുരാജ്യങ്ങളും പരസ്പരം ആക്രമണങ്ങൾ ശക്തമാക്കിയിരിക്കുകയാണ്. ഓഗസ്റ്റ് 9ന് റഷ്യൻ ആക്രമണത്തിൽ ഒഡേസ തുറമുഖത്തിന് നാശനഷ്ടമുണ്ടായതായി യുക്രൈൻ ആരോപിച്ചു; ബെൽഗൊറോഡിൽ യുക്രൈൻ ഡ്രോൺ ആക്രമണത്തിൽ അഞ്ച് പേർ കൊല്ലപ്പെട്ടതായി റഷ്യയും അറിയിച്ചു.