നിലവാരമില്ലാത്ത ഉൽപ്പന്നം എത്തിച്ചതിന് ഫ്ലിപ്പ്കാർട്ടിന് കോടതി 10,000 രൂപ പിഴ ചുമത്തി

മുംബൈ: നിലവാരമില്ലാത്ത ഉൽപ്പന്നം ഉപഭോക്താവിന് എത്തിച്ച ഇ-കൊമേഴ്‌സ് കമ്പനിയായ ഫ്ലിപ്കാർട്ടിന് കോടതി 10,000 രൂപ പിഴ ചുമത്തി. ഗോരേഗാവ് സ്വദേശി തരുണ രാജ്പുത് എന്ന സ്ത്രീ നൽകിയ പരാതിയിലാണ് മുംബൈ ഉപഭോക്തൃ കോടതിയുടെ ഉത്തരവ്.

ഫ്‌ളിപ്കാർട്ടിൽ നിന്ന് തനിക്ക് ഗുണനിലവാരമില്ലാത്ത ഉൽപ്പന്നം ലഭിച്ചിട്ടുണ്ടെന്നും അത് തിരികെ നൽകാൻ ശ്രമിച്ചപ്പോൾ കമ്പനി അത് സ്വീകരിക്കാൻ തയ്യാറായില്ലെന്നും യുവതി പരാതിയിൽ പറയുന്നു.

ഫ്‌ളിപ്കാർട്ടിൻ്റെ 'നോ റിട്ടേൺ പോളിസി' അന്യായമാണെന്ന് കോടതി വിധി പ്രസ്താവിച്ചു. ഒക്ടോബർ 9 ന് തരുണ 13 കുപ്പി ഹെർബലൈഫ് ന്യൂട്രീഷൻ ഫ്രഷ് എനർജി ഡ്രിങ്ക് മിക്സ് ഫ്ലിപ്കാർട്ടിൽ നിന്ന് 4,641 രൂപയ്ക്ക് വാങ്ങിയിരുന്നു. ഉൽപ്പന്നങ്ങൾ ഒക്ടോബർ 14 ന് അവളുടെ വീട്ടിലെത്തി. പാക്കേജ് തുറന്നപ്പോൾ ഉൽപ്പന്നങ്ങളുടെ കാലാവധി കഴിഞ്ഞതായി അവർ കണ്ടെത്തി.

ഗുണനിലവാരം കുറവായതിനാൽ ഇവ തിരികെ നൽകാൻ യുവതി ശ്രമിച്ചു. എന്നാൽ 'നോ റിട്ടേൺ പോളിസി' ചൂണ്ടിക്കാട്ടി യുവതിയുടെ അപേക്ഷ ഫ്ലിപ്കാർട്ട് നിരസിച്ചു. ഇതേത്തുടർന്നാണ് യുവതി ഉപഭോക്തൃ കോടതിയെ സമീപിച്ചത്. ഉൽപ്പന്നത്തിൻ്റെ ഫോട്ടോകളും ഫ്ലിപ്കാർട്ടിൻ്റെ കസ്റ്റമർ കെയറുമായുള്ള സംഭാഷണവും പരിശോധിച്ച ശേഷമാണ് കോടതി വിധി പുറപ്പെടുവിച്ചത്.