ചെലവ് ചുരുക്കാൻ വൻ നീക്കവുമായി ഡിസ്നി; ആയിരക്കണക്കിന് ജീവനക്കാരെ പിരിച്ചുവിടാൻ ഒരുങ്ങുന്നു
ന്യൂയോർക്ക്: ആഗോള വിനോദമേഖലയിലെ പ്രമുഖ കമ്പനിയായ വാൾട്ട് ഡിസ്നി ആയിരക്കണക്കിന് ജീവനക്കാരെ പിരിച്ചുവിടാനുള്ള നീക്കവുമായി രംഗത്ത്. കമ്പനിയുടെ പ്രവർത്തനച്ചെലവ് കുറച്ച് ലാഭക്ഷമത വർധിപ്പിക്കുന്നതിന്റെ ഭാഗമായാണ് പുതിയ പുനഃസംഘടനാ പദ്ധതി. ചില വിഭാഗങ്ങളിലെ മാനേജർമാരോട് വാർഷിക ചെലവിൽ 20 ശതമാനം വരെ ലാഭമുണ്ടാക്കാനുള്ള നിർദേശങ്ങൾ തയ്യാറാക്കാനും ആവശ്യപ്പെട്ടിട്ടുണ്ട്. ബ്ലൂംബെർഗാണ് ഇതുസംബന്ധിച്ച റിപ്പോർട്ട് പുറത്തുവിട്ടത്.
ജീവനക്കാരുടെ എണ്ണം കുറയ്ക്കുന്നതിനൊപ്പം മറ്റ് പ്രവർത്തനച്ചെലവുകൾ നിയന്ത്രിച്ചും ലക്ഷ്യമിട്ട സാമ്പത്തിക നേട്ടം കൈവരിക്കാനാണ് കമ്പനിയുടെ നീക്കം. ഡിസ്നിയുടെ തീം പാർക്കുകൾ, ടെലിവിഷൻ ശൃംഖലകൾ, സിനിമാ സ്റ്റുഡിയോകൾ തുടങ്ങിയ വിഭാഗങ്ങളെ പുനഃസംഘടന ബാധിക്കുമെന്നാണ് റിപ്പോർട്ട്. എന്നാൽ ഏത് വിഭാഗത്തിൽ എത്ര ജീവനക്കാരെ ഒഴിവാക്കുമെന്ന കാര്യത്തിൽ ഔദ്യോഗിക വിശദാംശങ്ങൾ പുറത്തുവന്നിട്ടില്ല.
ചെലവ് ചുരുക്കുന്നതിലൂടെ ലഭിക്കുന്ന തുകയുടെ ഒരു ഭാഗം സിനിമാ-ടെലിവിഷൻ പരിപാടികളുടെ നിർമാണം, സാങ്കേതികവിദ്യ, തീം പാർക്കുകൾ, ക്രൂയിസ് കപ്പൽ ബിസിനസ് തുടങ്ങിയ മേഖലകളിൽ വീണ്ടും നിക്ഷേപിക്കാനാണ് സിഇഒ ജോഷ് ഡി അമാരോയുടെ ലക്ഷ്യം. നിലവിലെ സാമ്പത്തിക വർഷത്തിൽ ക്രമീകരിച്ച ഓഹരിയൊന്നിനുള്ള വരുമാനത്തിൽ ഇരട്ടയക്ക വളർച്ച കൈവരിക്കാനും കമ്പനി ലക്ഷ്യമിടുന്നുണ്ട്.
നിർമിതബുദ്ധിയുടെ വളർച്ച, ബോക്സ് ഓഫീസ് വരുമാനത്തിലെ ഇടിവ്, സ്ട്രീമിങ് മേഖലയിലെ കടുത്ത മത്സരം, അന്താരാഷ്ട്ര തീം പാർക്കുകളിലെ സന്ദർശകരുടെ എണ്ണത്തിലുണ്ടാകുന്ന മന്ദഗതി എന്നിവയാണ് ഡിസ്നി നേരിടുന്ന പ്രധാന വെല്ലുവിളികൾ. പരമ്പരാഗത ടെലിവിഷൻ വരുമാനം കുറയുന്നതും ഡിജിറ്റൽ പ്ലാറ്റ്ഫോമുകളിലേക്കുള്ള പ്രേക്ഷകരുടെ മാറ്റവും വിനോദവ്യവസായത്തിലെ കമ്പനികളെ ചെലവ് പുനഃക്രമീകരിക്കാൻ നിർബന്ധിതരാക്കുന്നുണ്ട്.
കഴിഞ്ഞ സാമ്പത്തിക വർഷത്തിന്റെ അവസാനത്തിൽ ഡിസ്നിയിൽ ആഗോളതലത്തിൽ ഏകദേശം 2.31 ലക്ഷം ജീവനക്കാരുണ്ടായിരുന്നു. 2023-ൽ മുൻ സിഇഒ ബോബ് ഐഗറിന്റെ നേതൃത്വത്തിൽ 7,000 തസ്തികകൾ വെട്ടിക്കുറച്ചിരുന്നു. തുടർന്ന് 2025-ലും 2026-ലും വിവിധ ഘട്ടങ്ങളിലായി ജീവനക്കാരുടെ എണ്ണം കുറച്ചു. പുതിയ നീക്കത്തെക്കുറിച്ച് ഡിസ്നി ഔദ്യോഗികമായി പ്രതികരിച്ചിട്ടില്ല. ആയിരക്കണക്കിന് തൊഴിലവസരങ്ങളെ ബാധിക്കാവുന്ന പുനഃസംഘടനാ പദ്ധതി ആഗോള വിനോദവ്യവസായത്തിൽ വലിയ ചർച്ചയായിരിക്കുകയാണ്.
