റാവൽപിണ്ടി ക്രിക്കറ്റ് സ്റ്റേഡിയത്തിൽ ഡ്രോൺ ആക്രമണം; ബ്രിട്ടീഷ് പി.എസ്.എൽ. കളിക്കാർ പ്രതിസന്ധിയിൽ

ന്യൂഡൽഹി: റാവൽപിണ്ടി ക്രിക്കറ്റ് സ്റ്റേഡിയത്തിന് ഡ്രോൺ ആക്രമണത്തിൽ കേടുപാടുകൾ സംഭവിച്ചതായി റിപ്പോർട്ട്. ഇന്ന് രാത്രി 8 മണിക്ക് നടക്കാനിരിക്കുന്ന പാകിസ്ഥാൻ സൂപ്പർ ലീഗ് മത്സരത്തിന് മണിക്കൂറുകൾക്ക് മുമ്പാണ് സ്റ്റേഡിയത്തിൽ ആക്രമണം നടന്നത്.

പെഷവാർ സാൽമിയും കറാച്ചി കിംഗ്സും തമ്മിലുള്ള മത്സരം ഇന്ന് രാത്രി നടക്കാനിരിക്കുകയായിരുന്നു. ഇന്ത്യയിലെ 15 സൈനിക കേന്ദ്രങ്ങൾ ആക്രമിക്കാൻ പാകിസ്ഥാൻ ശ്രമിച്ചതിനുള്ള പ്രതികാരമാണിതെന്ന് പറയപ്പെടുന്നു. ഇന്ത്യയുടെ പ്രത്യാക്രമണത്തിൽ ലാഹോറിലെ വ്യോമ പ്രതിരോധ റഡാർ സംവിധാനങ്ങൾക്ക് കേടുപാടുകൾ സംഭവിച്ചു.

ക്രിക്കറ്റ് സ്റ്റേഡിയത്തിന് സമീപമുള്ള ഒരു റെസ്റ്റോറന്റ് കെട്ടിടത്തിനും നാശനഷ്ടങ്ങൾ സംഭവിച്ചതായി റിപ്പോർട്ടിൽ പറയുന്നു. അധികൃതർ പ്രദേശം സീൽ ചെയ്തു. ആക്രമണത്തിൽ രണ്ട് പേർക്ക് പരിക്കേറ്റു, ഇവരെ ആശുപത്രിയിൽ പ്രവേശിപ്പിച്ചു. സംഘർഷം വഷളാകുന്നത് കണക്കിലെടുത്ത് ഇവിടെ നടക്കാനിരിക്കുന്ന മത്സരങ്ങൾ ലാഹോറിലേക്ക് മാറ്റിയതായും റിപ്പോർട്ടുണ്ട്. പി.എസ്.എൽ മത്സരങ്ങളിൽ പങ്കെടുക്കുന്ന ഇംഗ്ലണ്ടിൽ നിന്നുള്ള കളിക്കാർ സ്വന്തം നാട്ടിലേക്ക് മടങ്ങാൻ പദ്ധതിയിടുന്നതായി ചില മാധ്യമങ്ങൾ റിപ്പോർട്ട് ചെയ്യുന്നു.

ലാഹോർ, ഗുജ്രൻവാല, ചക്വാൾ, ബഹാവൽപൂർ, മിയാനോ, കറാച്ചി, ചോർ, റാവൽപിണ്ടി, അറ്റോക്ക് എന്നിവിടങ്ങളിൽ നിന്ന് ചില ഡ്രോണുകൾ നിർവീര്യമാക്കിയതായി പാകിസ്ഥാൻ ആർമി വക്താവ് ലെഫ്റ്റനന്റ് ജനറൽ അഹമ്മദ് ഷെരീഫ് ചൗധരി നേരത്തെ അവകാശപ്പെട്ടിരുന്നു.

അവന്തിപോര, ശ്രീനഗർ, ജമ്മു, പത്താൻകോട്ട്, അമൃത്സർ, കപൂർത്തല, ജലന്ധർ, നൽ, ഫലോഡി, ഉത്തരലൈ, ഭുജ് എന്നിവയുൾപ്പെടെ ഇന്ത്യയിലെ നിരവധി സൈനിക കേന്ദ്രങ്ങൾ ആക്രമിക്കാൻ പാകിസ്ഥാൻ മുമ്പ് ഡ്രോണുകളും മിസൈലുകളും ഉപയോഗിച്ചിരുന്നു. എന്നാൽ വ്യോമ പ്രതിരോധ സംവിധാനങ്ങൾ ഉപയോഗിച്ച് ഇന്ത്യ ഇതിനെ പ്രതിരോധിച്ചു.

ഈ ആക്രമണങ്ങളുടെ അവശിഷ്ടങ്ങൾ കണ്ടെടുത്തതായി ഇന്ത്യൻ സൈന്യം അറിയിച്ചു. പാകിസ്ഥാനുമായി അതിർത്തി പങ്കിടുന്ന രാജസ്ഥാൻ, പഞ്ചാബ് സംസ്ഥാനങ്ങളിൽ ജാഗ്രതാ നിർദ്ദേശം നൽകിയിട്ടുണ്ട്.