'മയക്കുമരുന്ന് താൽക്കാലിക ലഹരി നൽകും, പക്ഷേ ജീവിതവും കരിയറും തകർക്കും

രാജ്യവ്യാപകമായി യുവാക്കളെ ലഹരിവിമുക്തരാക്കുക ലക്ഷ്യമിട്ട് 'നശാ മുക്ത് യുവ ഫോർ വിക്സിത് ഭാരത് സങ്കൽപ് അഭിയാൻ' എന്ന 100 ആഴ്ച നീളുന്ന ബോധവൽക്കരണ ക്യാമ്പയിൻ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. രാജ്യത്തുടനീളമുള്ള 10,000-ത്തിലധികം കേന്ദ്രങ്ങളിൽ ഒരു കോടിയിലേറെ യുവാക്കൾ ലഹരിവിരുദ്ധ പ്രതിജ്ഞയിൽ പങ്കുചേർന്നു. 

"മയക്കുമരുന്ന് കുറച്ച് സമയത്തേക്ക് ലഹരി നൽകുമെങ്കിലും അത് ഒരാളുടെ കരിയറിനെയും വ്യക്തിജീവിതത്തെയും തകർക്കും. വികസിത ഇന്ത്യയെ കെട്ടിപ്പടുക്കാൻ ശാരീരികമായും മാനസികമായും ആരോഗ്യവാന്മാരായ യുവതലമുറ അനിവാര്യമാണ്," എന്ന് പ്രധാനമന്ത്രി പറഞ്ഞു. 

ഓരോ ഞായറാഴ്ചയും അടുത്ത 100 ആഴ്ചകളിലായി രാജ്യവ്യാപകമായി കായികമത്സരങ്ങൾ, വാക്കത്തോൺ, ധ്യാനപരിപാടികൾ, തെരുവുനാടകങ്ങൾ, കലാപരിപാടികൾ എന്നിവ സംഘടിപ്പിച്ചാണ് ലഹരിവിരുദ്ധ സന്ദേശം ജനങ്ങളിലെത്തിക്കുക. യുവജന സംഘടനകൾ, വിദ്യാഭ്യാസ സ്ഥാപനങ്ങൾ, സന്നദ്ധസംഘടനകൾ, ആത്മീയ സംഘടനകൾ എന്നിവയും ക്യാമ്പയിനിൽ പങ്കാളികളാകും.