'ഇന്ത്യ മുഴുവൻ തിരഞ്ഞാലും ഇതുപോലൊരു സീതയെ കിട്ടില്ല'; സായ് പല്ലവിക്കെതിരായ ട്രോളുകൾക്ക് മറുപടിയുമായി ധനുഷ്

ചെന്നൈ: നിതേഷ് തിവാരിയുടെ ബിഗ് ബജറ്റ് ചിത്രം 'രാമായണ'ത്തിൽ സീതാദേവിയായി അഭിനയിക്കുന്ന സായ് പല്ലവിക്കെതിരായ വിമർശനങ്ങൾക്കും സമൂഹമാധ്യമങ്ങളിലെ ട്രോളുകൾക്കും മറുപടിയുമായി നടൻ ധനുഷ്. സായ് പല്ലവിയെപ്പോലെ ഭക്തിയും പരിശുദ്ധമായ മനസ്സുമുള്ള മറ്റൊരു നടിയെ സീതയുടെ വേഷത്തിലേക്ക് ഇന്ത്യ മുഴുവൻ തിരഞ്ഞാലും കണ്ടെത്താനാകില്ലെന്ന് ധനുഷ് പറഞ്ഞു. ഇരുവരും വീണ്ടും ഒന്നിക്കുന്ന പുതിയ ചിത്രം 'ഒം' (OM) സിനിമയുടെ പ്രീ-റിലീസ് ചടങ്ങിൽ സംസാരിക്കുകയായിരുന്നു അദ്ദേഹം.

സീതയായി സായ് പല്ലവിയെ തിരഞ്ഞെടുത്തതുമായി ബന്ധപ്പെട്ട് ഉയരുന്ന വിവാദങ്ങളും വിമർശനങ്ങളും തനിക്ക് മനസ്സിലാകുന്നില്ലെന്ന് ധനുഷ് വ്യക്തമാക്കി. ചിത്രീകരണത്തിനിടെ ഇടവേളകളിൽ പോലും സായ് പല്ലവി പ്രാർഥനയിൽ മുഴുകാറുണ്ടായിരുന്നു. ദൈവത്തോടുള്ള ആഴത്തിലുള്ള ഭക്തിയും ശുദ്ധമായ മനസ്സും മികച്ച അഭിനയശേഷിയുമുള്ള വ്യക്തിയാണ് സായ് പല്ലവിയെന്നും അദ്ദേഹം കൂട്ടിച്ചേർത്തു. സീതയുടെ കഥാപാത്രത്തെ അവതരിപ്പിക്കാൻ അവർക്ക് കഴിയുമെന്നതിൽ തനിക്ക് സംശയമില്ലെന്നും ധനുഷ് പറഞ്ഞു.

സായ് പല്ലവിയുമായുള്ള ആദ്യ കൂടിക്കാഴ്ചയും ഒമ്പത് വർഷങ്ങൾക്കുശേഷം വീണ്ടും ഒന്നിച്ചപ്പോഴുള്ള അനുഭവവും ധനുഷ് പങ്കുവെച്ചു. 'മാരി 2' ചിത്രത്തിന്റെ സെറ്റിൽവെച്ച് ആദ്യമായി കണ്ടപ്പോൾ വളരെ കുറച്ച് മാത്രം സംസാരിക്കുന്ന, കാര്യങ്ങൾ ആലോചിച്ച് മാത്രം പറയുന്ന വ്യക്തിയായിരുന്നു സായ് പല്ലവി. എന്നാൽ 'ഒം' സിനിമയുടെ സെറ്റിൽ വീണ്ടും കണ്ടപ്പോൾ ആത്മവിശ്വാസവും സിനിമയെക്കുറിച്ചുള്ള വ്യക്തമായ ധാരണയുമുള്ള അഭിനേത്രിയായി അവർ മാറിയിരുന്നുവെന്ന് ധനുഷ് പറഞ്ഞു. സംസാരത്തിലും നടത്തത്തിലും ഭാവപ്രകടനങ്ങളിലുമെല്ലാം ആ മാറ്റം പ്രകടമായിരുന്നുവെന്നും അദ്ദേഹം കൂട്ടിച്ചേർത്തു.

നിതേഷ് തിവാരി സംവിധാനം ചെയ്യുന്ന രണ്ട് ഭാഗങ്ങളുള്ള ചിത്രമാണ് 'രാമായണ'. രൺബീർ കപൂർ ശ്രീരാമനായും സായ് പല്ലവി സീതയായും യഷ് രാവണനായും രവി ദുബെ ലക്ഷ്മണനായും സണ്ണി ഡിയോൾ ഹനുമാനായും വേഷമിടുന്നു. ചിത്രത്തിന്റെ ആദ്യഭാഗം നവംബർ അഞ്ചിന് തിയേറ്ററുകളിലെത്തി. അതേസമയം, ധനുഷും സായ് പല്ലവിയും വീണ്ടും ഒന്നിക്കുന്ന 'ഒം' സിനിമയിൽ നിത്യ റെഡ്ഡി എന്ന സിബിഐ ഉദ്യോഗസ്ഥയുടെ വേഷത്തിലാണ് സായ് എത്തുന്നത്. മമ്മൂട്ടിയും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നു. നവംബർ 20-നാണ് സിനിമയുടെ റിലീസ് പ്രഖ്യാപിച്ചിരിക്കുന്നത്.