ഹോർമുസ് കടലിടുക്കിന് സമീപം എണ്ണ ടാങ്കറിൽ സ്ഫോടനം; മേഖലയിലെ സുരക്ഷാ ആശങ്ക വീണ്ടും ശക്തമായി

ഇറാനോട് ചേർന്നുള്ള ഹോർമുസ് കടലിടുക്കിൽ ഒരു എണ്ണ ടാങ്കർ നാവിക മൈനിൽ ഇടിച്ചുണ്ടായെന്ന റിപ്പോർട്ടുകൾക്ക് പിന്നാലെ സ്ഫോടനമുണ്ടായി. നിശ്ചയിച്ചിരുന്ന കടൽപാത വിട്ട് സഞ്ചരിച്ച കപ്പലാണ് അപകടത്തിൽപ്പെട്ടതെന്നാണ് ഇറാൻ മാധ്യമങ്ങൾ റിപ്പോർട്ട് ചെയ്യുന്നത്. 

സ്ഫോടനത്തെ തുടർന്ന് ടാങ്കറിൽ തീപിടിക്കുകയും സമീപത്തുണ്ടായിരുന്ന മറ്റ് കപ്പലുകൾ സുരക്ഷാ കാരണങ്ങളാൽ യാത്ര മാറ്റുകയോ തിരിച്ചുപോകുകയോ ചെയ്തതായി റിപ്പോർട്ടുകളുണ്ട്. സംഭവത്തിന്റെ സ്വതന്ത്ര സ്ഥിരീകരണം ലഭ്യമായിട്ടില്ലെങ്കിലും, ഹോർമുസ് കടലിടുക്കിലെ സുരക്ഷാ സാഹചര്യം വീണ്ടും ആശങ്കയിലാക്കിയിരിക്കുകയാണ്. 

ലോകത്തെ എണ്ണക്കയറ്റുമതിയിലെ നിർണായക കടൽപാതയായ ഹോർമുസ് കടലിടുക്കിൽ സംഘർഷം രൂക്ഷമായാൽ ആഗോള ഊർജവിപണിയെയും കപ്പൽഗതാഗതത്തെയും സാരമായി ബാധിക്കുമെന്നാണ് വിദഗ്ധരുടെ മുന്നറിയിപ്പ്. സമീപകാല പ്രാദേശിക സംഘർഷങ്ങളുടെ പശ്ചാത്തലത്തിൽ മേഖലയിലെ സുരക്ഷാ ഭീഷണി വീണ്ടും ഉയർന്നിരിക്കുകയാണെന്നും റിപ്പോർട്ടുകൾ ചൂണ്ടിക്കാട്ടുന്നു.