നാല് പതിറ്റാണ്ട്, ഫാഷന്റെ രാജകീയ കൈയൊപ്പ്; അബു ജാനി–സന്ദീപ് ഖോസ്ലയുടെ ആഘോഷത്തിൽ താരങ്ങൾ പോലും ‘അണ്ടർഡ്രസ്ഡ്

ഇന്ത്യൻ ഫാഷന്റെ ഭാവം തന്നെ മാറ്റിയെഴുതിയ ഡിസൈനർ ദ്വയം അബു ജാനിയും സന്ദീപ് ഖോസ്ലയും നാല് പതിറ്റാണ്ട് പൂർത്തിയാക്കിയപ്പോൾ, ആഘോഷവേദി മാറിയത് ഒരു ഫാഷൻ പരേഡായി. ‘മുബാറക് ബാഗ്’ എന്ന പേരിൽ നടന്ന ആഘോഷത്തിൽ ബോളിവുഡ് താരങ്ങളും പ്രമുഖരും സൂപ്പർ മോഡലുകളും അണിനിരന്നപ്പോൾ, ഓരോ വേഷവും ഡിസൈനർ ദ്വയത്തിന്റെ നാല് പതിറ്റാണ്ട് നീണ്ട പാരമ്പര്യത്തിന് ഒരു ആദരവായി.

1980കളിൽ ആരംഭിച്ച ഈ കൂട്ടുകെട്ട് ഇന്ത്യൻ കരകൗശല പാരമ്പര്യത്തെയും ആധുനിക കട്ടിങ്ങിനെയും ആഡംബരത്തിന്റെ പുതിയ ഭാഷയിലേക്ക് കൊണ്ടുവന്നവരിലാണ് മുൻപന്തിയിൽ. എംബ്രോയ്ഡറി, സമ്പന്നമായ ടെക്സ്റ്റൈൽസ്, സൂക്ഷ്മമായ കൈപ്പണി, രാജകീയ സിലൂയറ്റുകൾ—ഇവയെല്ലാം ചേർന്നതാണ് അബു ജാനി–സന്ദീപ് ഖോസ്ല ശൈലിയുടെ മുഖമുദ്ര.

നാല് പതിറ്റാണ്ടിന്റെ ആഘോഷത്തിൽ നിത അംബാനി, ഇഷ അംബാനി, രാധിക അംബാനി, ശ്ലോക അംബാനി തുടങ്ങിയവർ ഡിസൈനർ ദ്വയത്തിന്റെ കസ്റ്റം വേഷങ്ങളിലാണ് എത്തിയത്. സോനം കപൂറും തന്റെ ക്രീം നിറത്തിലുള്ള അതിമനോഹരമായ അനാർക്കലി ലുക്കിലൂടെ ശ്രദ്ധ നേടി. അലങ്കാരത്തിന്റെ അതിരുകൾ കടക്കാതെ എംബ്രോയ്ഡറിയും ടെക്സ്ചറും മാത്രം കൊണ്ട് വേഷത്തിന് രാജകീയ ഭാവം നൽകുകയായിരുന്നു ആ ലുക്കിന്റെ പ്രത്യേകത.

ജെനീലിയ ദേശ്മുഖിന്റെ വേഷത്തിലും നാല് പതിറ്റാണ്ടിന്റെ കരകൗശല പാരമ്പര്യം വ്യക്തമായി. മാരോഡി, ഗോട്ട, വാസ്ലി, ത്രെഡ് വർക്ക്, സീക്വിൻസ് തുടങ്ങിയ വിവിധ എംബ്രോയ്ഡറി രീതികൾ ഒരേ വേഷത്തിൽ ചേർത്തപ്പോൾ, പരമ്പരാഗത ഇന്ത്യൻ സൗന്ദര്യവും സമകാലിക ഫാഷനും ഒരുമിച്ചെത്തി.

ഇതിനിടെ, ശ്വേത ബച്ചൻ 2015ൽ ധരിച്ച അതേ അബു ജാനി–സന്ദീപ് ഖോസ്ല വേഷം മകൾ നവ്യ നന്ദ വീണ്ടും അണിഞ്ഞതും ആഘോഷത്തിന് മറ്റൊരു മനോഹരമായ അർഥം നൽകി. ഒരു വേഷം ഒരു തലമുറയിൽ നിന്ന് മറ്റൊന്നിലേക്ക് സഞ്ചരിക്കുന്ന ഫാഷൻ ഓർമ്മയായി മാറിയപ്പോൾ, നാല് പതിറ്റാണ്ടുകൾ പിന്നിട്ടിട്ടും ഈ ഡിസൈനർ ദ്വയത്തിന്റെ സൃഷ്ടികൾക്ക് കാലം ബാധകമല്ലെന്ന് ഒരിക്കൽ കൂടി തെളിഞ്ഞു.