അസ്ത്ര മിസൈൽ മുതൽ ബ്രഹ്മോസ് വരെ; ഇവിഎമ്മും സബാങ് തുറമുഖവും ഉൾപ്പെടെ ഇന്ത്യയോട് ആവശ്യങ്ങളുമായി ഇന്തോനേഷ്യ

പ്രധാനമന്ത്രി നരേന്ദ്ര മോദിയുടെ ഇന്തോനേഷ്യ സന്ദർശനത്തോടനുബന്ധിച്ച് ഇന്ത്യ–ഇന്തോനേഷ്യ ബന്ധം കൂടുതൽ ശക്തമാകുന്നു. പ്രതിരോധം, സമുദ്രസുരക്ഷ, നിർണായക ധാതുക്കൾ, തെരഞ്ഞെടുപ്പ് സാങ്കേതികവിദ്യ തുടങ്ങിയ മേഖലകളിൽ ഇരുരാജ്യങ്ങളും സഹകരണം വ്യാപിപ്പിക്കാനാണ് നീക്കം. 

ഇന്ത്യ വികസിപ്പിച്ച അസ്ത്ര വായു-വായു മിസൈലുകളും ബ്രഹ്മോസ് സൂപ്പർസോണിക് ക്രൂയിസ് മിസൈലുകളും സ്വന്തമാക്കുന്നതിൽ ഇന്തോനേഷ്യ വലിയ താൽപര്യം പ്രകടിപ്പിച്ചിട്ടുണ്ട്. ഇതിലൂടെ ഇരു രാജ്യങ്ങളും തമ്മിലുള്ള പ്രതിരോധ സഹകരണം പുതിയ തലത്തിലേക്ക് ഉയരുമെന്നാണ് വിലയിരുത്തൽ. 

ഇന്ത്യയുടെ ഇലക്ട്രോണിക് വോട്ടിംഗ് മെഷീൻ (EVM) മാതൃകയും ഇന്തോനേഷ്യയുടെ ശ്രദ്ധ നേടിയിട്ടുണ്ട്. ഇന്തോനേഷ്യയ്ക്ക് അനുയോജ്യമായ ഇവിഎമ്മുകൾ വികസിപ്പിക്കുന്നതിന് ഇന്ത്യ സാങ്കേതിക പിന്തുണ നൽകുമെന്നാണ് റിപ്പോർട്ടുകൾ. 

ഇതിനൊപ്പം, തന്ത്രപ്രധാനമായ സബാങ് തുറമുഖത്തിന്റെ വികസനത്തിലും സമുദ്രസുരക്ഷാ സഹകരണത്തിലും ഇരുരാജ്യങ്ങളും കൂടുതൽ ശ്രദ്ധ കേന്ദ്രീകരിക്കും. ഹിന്ദുമഹാസമുദ്ര മേഖലയിലെ സുരക്ഷയും വ്യാപാര ബന്ധങ്ങളും ശക്തിപ്പെടുത്തുന്നതിൽ ഈ പദ്ധതി നിർണായകമാകുമെന്നാണ് വിലയിരുത്തൽ. 

നിർണായക ധാതുക്കളുടെ വിതരണ ശൃംഖല, വ്യാപാരം, നിക്ഷേപം, ഭക്ഷ്യ-ഊർജ സുരക്ഷ, ആരോഗ്യ-വിദ്യാഭ്യാസ മേഖലകളിലെ സഹകരണം എന്നിവയും മോദി–പ്രബോവോ ചർച്ചകളിലെ പ്രധാന വിഷയങ്ങളാണ്. നിരവധി കരാറുകളും ധാരണാപത്രങ്ങളും ഒപ്പുവെക്കുമെന്നാണ് പ്രതീക്ഷ.