ചരിത്രനേട്ടം; മനുഷ്യ അഭിഭാഷകരെതിരെ കേസ് ജയിച്ച് AI അധിഷ്ഠിത നിയമസ്ഥാപനം

ലണ്ടൻ: നിയമരംഗത്ത് ചരിത്രം കുറിച്ച്, ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് പ്രവർത്തിക്കുന്ന ഒരു നിയമസ്ഥാപനം മനുഷ്യ അഭിഭാഷകർ വാദിച്ച കേസിൽ വിജയം നേടി. ലോകത്ത് ആദ്യമായാണ് AI തയ്യാറാക്കിയ നിയമരേഖകളുടെ സഹായത്തോടെ ഒരു കേസ് കോടതിയിൽ വിജയിക്കുന്നതെന്നാണ് റിപ്പോർട്ടുകൾ. 

ഇംഗ്ലണ്ടിലെ വാൻഡ്‌സ്‌വർത്ത് കൗണ്ടി കോടതിയിൽ നടന്ന കേസിൽ, ഫ്രീലാൻസ് എച്ച്ആർ കൺസൾട്ടന്റിന് ലഭിക്കാനുണ്ടായിരുന്ന 7,000 പൗണ്ട് കുടിശ്ശിക ഈടാക്കാനാണ് Garfield AI എന്ന AI നിയമസ്ഥാപനം സഹായിച്ചത്. ഏകദേശം 400 പൗണ്ട് ചെലവിലാണ് കേസ് മുന്നോട്ടുകൊണ്ടുപോയത്. 

കേസിലെ ഹർജി, സാക്ഷിമൊഴികൾ, വിചാരണയ്ക്കുള്ള രേഖകൾ എന്നിവയെല്ലാം AI തയ്യാറാക്കിയപ്പോൾ, കോടതിയിൽ അന്തിമ വാദം അവതരിപ്പിച്ചത് ഒരു മനുഷ്യ ബാരിസ്റ്ററായിരുന്നു. മറുവശത്ത് പ്രതിഭാഗത്തെ പ്രതിനിധീകരിച്ചത് ഒരു സോളിസിറ്ററും ഒരു ബാരിസ്റ്ററും ആയിരുന്നു. വിധി പരാതിക്കാരിക്ക് അനുകൂലമായി. 

2025-ൽ ഇംഗ്ലണ്ടിലെയും വെയിൽസിലെയും Solicitors Regulation Authority (SRA)-യുടെ അംഗീകാരം നേടിയ ആദ്യ AI അധിഷ്ഠിത നിയമസ്ഥാപനമാണ് Garfield AI. ചെറിയ സാമ്പത്തിക തർക്കങ്ങൾ കുറഞ്ഞ ചെലവിൽ പരിഹരിക്കാൻ AI ഉപയോഗിച്ച് നിയമസഹായം നൽകുകയാണ് സ്ഥാപനത്തിന്റെ ലക്ഷ്യം. 

അതേസമയം, AI നിയമരംഗത്ത് വലിയ മുന്നേറ്റം നടത്തിയെങ്കിലും, സങ്കീർണമായ കേസുകളിൽ മനുഷ്യ അഭിഭാഷകരുടെ മേൽനോട്ടവും കോടതിയിലെ വാദവും ഇപ്പോഴും അനിവാര്യമാണെന്ന് നിയമവിദഗ്ധർ ചൂണ്ടിക്കാട്ടുന്നു. ഈ വിജയം AI മനുഷ്യ അഭിഭാഷകരെ പൂർണമായി മാറ്റിസ്ഥാപിച്ചതിന്റെ തെളിവല്ലെന്നും, മറിച്ച് നിയമസേവനങ്ങൾ കൂടുതൽ വേഗത്തിലും ചെലവുകുറഞ്ഞും ലഭ്യമാക്കാൻ AIക്ക് കഴിയുമെന്ന് കാണിക്കുന്ന നാഴികക്കല്ലാണെന്നും അവർ വിലയിരുത്തുന്നു.