'ദൈവത്തെ കാണാൻ ഇവിടെ വന്നതാ, മാറി നിൽക്കൂ'

പാലക്കാട്: നടൻ വിനായകന് ക്ഷേത്രപ്രവേശനം വിലക്കിയിട്ടില്ലെന്ന് വ്യക്തമാക്കി കൽപ്പാത്തി ക്ഷേത്രം ഭാരവാഹികൾ. നടന് ക്ഷേത്രപരിസരത്ത് പ്രവേശനം വിലക്കിയതായി ചില റിപ്പോർട്ടുകൾ വന്നതിന് പിന്നാലെ വിശദീകരണവുമായി ഭാരവാഹികൾ രംഗത്തെത്തി.

രാത്രി 11 മണി കഴിഞ്ഞതിനാൽ ക്ഷേത്രത്തിൽ കയറാൻ പറ്റില്ലെന്ന് മാത്രമാണ് നാട്ടുകാർ വിനായകനോട് പറഞ്ഞത്. മറ്റ് തർക്കങ്ങളൊന്നും ഉണ്ടായിരുന്നില്ലെന്ന് വാർഡ് കൗൺസിലർ സുബാഷ് പറഞ്ഞു. എല്ലാ ദിവസവും രാവിലെ 5 മണി മുതൽ 9 മണി വരെയും വൈകുന്നേരം 5 മണി മുതൽ 8 മണി വരെയും ക്ഷേത്രം പൊതുജനങ്ങൾക്കായി തുറന്നിരിക്കും.

കൽപ്പാത്തിയിൽ ക്ഷേത്രദർശനത്തിനെത്തിയ വിനായകനെ ക്ഷേത്രത്തിൽ പ്രവേശിപ്പിക്കാൻ അനുവദിച്ചില്ലെന്ന വീഡിയോ പുറത്തുവന്നതിനെ തുടർന്ന് നേരത്തെ വിവാദം ഉയർന്നിരുന്നു. സംഭവവുമായി ബന്ധപ്പെട്ട് അനാവശ്യ വിവാദം ഉണ്ടാക്കാനാണ് ചിലർ ശ്രമിക്കുന്നതെന്നാണ് നാട്ടുകാരുൾപ്പെടെയുള്ളവരുടെ വാദം.

ക്ഷേത്രത്തിൽ ചില ജോലികൾ നടന്നിരുന്നു. വിനായകൻ തൊപ്പി ധരിച്ചിരുന്നതിനാൽ ക്ഷേത്രത്തിലുണ്ടായിരുന്നവർക്ക് തിരിച്ചറിയാൻ കഴിഞ്ഞില്ല. എൻ്റെ ധാരണ പ്രകാരം അവർ ആരാണെന്ന് ചോദിച്ചപ്പോൾ വിനായകൻ ദേഷ്യപ്പെട്ടു. സംഭവത്തിൽ അനാവശ്യ വിവാദങ്ങൾ ഉണ്ടാക്കാനാണ് ചിലർ ശ്രമിക്കുന്നതെന്നും സുബാഷ് കൂട്ടിച്ചേർത്തു.

രാത്രി ക്ഷേത്രം അടച്ച ശേഷമാണ് വിനായകൻ കൽപ്പാത്തിയിലെത്തിയത്. തുടർന്ന് ക്ഷേത്രത്തിൽ പ്രവേശിക്കണമെന്ന ആവശ്യം ഉന്നയിച്ചു. എന്നാൽ സമയം രാത്രി 11 മണി കഴിഞ്ഞതിനാൽ ക്ഷേത്രത്തിൽ പ്രവേശിക്കാനാകില്ലെന്ന് പരിസരത്തുണ്ടായിരുന്ന നാട്ടുകാർ പറഞ്ഞു. ഇതോടെ നടനും നാട്ടുകാരും തമ്മിൽ തർക്കമുണ്ടായി. സംഭവത്തിൻ്റെ വീഡിയോ ഇപ്പോൾ സോഷ്യൽ മീഡിയയിൽ പ്രചരിക്കുകയാണ്. ദൈവത്തെ കാണാനാണ് താൻ അവിടെ വന്നതെന്ന് വിനായകൻ പറയുന്നതാണ് വീഡിയോയിലുള്ളത്.