ഇന്ത്യയുടെ 100 ബില്യൺ ഡോളർ സാങ്കേതിക വ്യവസായ വളർച്ച; ആറ് മേഖലകൾക്ക് വൻ സാധ്യതയെന്ന് ജെഫറീസ്

ഇന്ത്യയുടെ അടുത്ത ഘട്ട വ്യാവസായിക വളർച്ചയ്ക്ക് ആറ് പ്രധാന മേഖലകൾ നിർണായകമാകുമെന്ന് ആഗോള നിക്ഷേപ സ്ഥാപനമായ ജെഫറീസ് വിലയിരുത്തുന്നു. ബഹിരാകാശം, വ്യോമയാനം, ഡാറ്റാ സെന്ററുകൾ, സൗരോർജം, അർധചാലകങ്ങൾ, ഇലക്ട്രോണിക്സ് എന്നിവയാണ് വൻ നിക്ഷേപവും സാങ്കേതിക മുന്നേറ്റവും പ്രതീക്ഷിക്കുന്ന മേഖലകളായി റിപ്പോർട്ട് ചൂണ്ടിക്കാട്ടുന്നത്. 

വിശാലമായ ആഭ്യന്തര വിപണി, സ്വകാര്യ കമ്പനികളുടെ വർധിച്ച പങ്കാളിത്തം, കേന്ദ്രസർക്കാരിന്റെ വ്യവസായ അനുകൂല നയങ്ങൾ എന്നിവയാണ് ഈ മേഖലകളുടെ വളർച്ചയ്ക്ക് പ്രധാന പിന്തുണയാകുന്നതെന്ന് ജെഫറീസ് പറയുന്നു. നിർമാണ രംഗത്ത് ഇറക്കുമതി ആശ്രിതത്വം കുറച്ച് ആഭ്യന്തര ഉൽപാദനം ശക്തിപ്പെടുത്താനുള്ള ഇന്ത്യയുടെ ശ്രമങ്ങളും ഇതിന് സഹായകരമാണ്. 

ഇലക്ട്രോണിക്സ് മേഖലയിൽ മൊബൈൽ ഫോൺ അസംബ്ലിയിൽ നിന്ന് ഘടക നിർമാണത്തിലേക്കുള്ള മാറ്റം ഇതിനകം ശക്തമാകുകയാണ്. സർക്കാർ പദ്ധതികളുടെ പിന്തുണയോടെ പ്രിന്റഡ് സർക്യൂട്ട് ബോർഡുകൾ ഉൾപ്പെടെയുള്ള ഘടകങ്ങളുടെ ആഭ്യന്തര ഉൽപാദനം വർധിപ്പിക്കാനാണ് ശ്രമം. നിലവിൽ ചില ഘടകങ്ങളിൽ ഇന്ത്യയുടെ ഇറക്കുമതി ആശ്രിതത്വം 85–90 ശതമാനം വരെയാണെന്നും ജെഫറീസ് വിലയിരുത്തുന്നു. 

പ്രതിരോധ മേഖലയിലും വലിയ വിപണി സാധ്യതയാണ് ഇന്ത്യയ്ക്കുള്ളതെന്ന് ജെഫറീസ് നേരത്തെ ചൂണ്ടിക്കാട്ടിയിരുന്നു. 2030ഓടെ ഇന്ത്യയുടെ പ്രതിരോധ കയറ്റുമതി 584 ബില്യൺ രൂപയിലെത്തുമെന്നും വാർഷികമായി ഏകദേശം 11 ശതമാനം വളർച്ച പ്രതീക്ഷിക്കാമെന്നും റിപ്പോർട്ടിൽ വിലയിരുത്തുന്നു. ആഭ്യന്തര പ്രതിരോധ വിപണിയിൽ ഏകദേശം 60 ബില്യൺ ഡോളറിന്റെ അവസരവും സ്ഥാപനം കണക്കാക്കുന്നു. 

ബഹിരാകാശം മുതൽ അർധചാലകങ്ങൾ വരെയുള്ള പുതിയ വ്യവസായ മേഖലകളിലെ നിക്ഷേപം ഇന്ത്യയെ ആഗോള വ്യാവസായിക-സാങ്കേതിക ശക്തിയായി ഉയർത്താനുള്ള സാധ്യത വർധിപ്പിക്കുമെന്നാണ് ജെഫറീസിന്റെ വിലയിരുത്തൽ. അടുത്ത വർഷങ്ങളിൽ ഈ മേഖലകളിലെ അടിസ്ഥാനസൗകര്യ വികസനവും സ്വകാര്യ നിക്ഷേപവും ഇന്ത്യയുടെ വളർച്ചയുടെ പ്രധാന ചാലകങ്ങളാകുമെന്നാണ് റിപ്പോർട്ടിന്റെ വിലയിരുത്തൽ.