ടി20 ലോകകപ്പിനുള്ള ഇന്ത്യൻ ടീമിനെ പ്രഖ്യാപിച്ചു; രോഹിത് ശർമ്മ നയിക്കുന്ന ടീമിൽ സഞ്ജു സാംസൺ

അഹമ്മദാബാദ്: ട്വൻ്റി20 ലോകകപ്പിനുള്ള ഇന്ത്യൻ ടീമിനെ പ്രഖ്യാപിച്ചു. ഐപിഎല്ലിൽ മികച്ച പ്രകടനം പുറത്തെടുത്ത മലയാളി താരം സഞ്ജു സാംസൺ ടീമിൽ ഇടം നേടി. രണ്ടാം വിക്കറ്റ് കീപ്പറായി സഞ്ജുവിനെ ഉൾപ്പെടുത്തിയിട്ടുണ്ട്.

രോഹിത് ശർമ്മ നയിക്കുന്ന ടീമിൻ്റെ വൈസ് ക്യാപ്റ്റൻ ഹാർദിക് പാണ്ഡ്യയാണ്. യുസ്വേന്ദ്ര ചാഹൽ ടീമിൽ ഇടം നേടിയിട്ടുണ്ട്. ഐപിഎല്ലിലെ മോശം പ്രകടനമാണ് കെ എൽ രാഹുലിന് തിരിച്ചടിയായത്. അദ്ദേഹത്തെ ടീമിൽ ഉൾപ്പെടുത്തിയിട്ടില്ല.

വെസ്റ്റ് ഇൻഡീസും യുഎസും ആതിഥേയത്വം വഹിക്കുന്ന 2024 ലെ ഐസിസി ട്വൻ്റി 20 ലോകകപ്പിനുള്ള ഇന്ത്യയുടെ 15 അംഗ ടീമിനെ സീനിയർ സെലക്ഷൻ കമ്മിറ്റി ചൊവ്വാഴ്ച പ്രഖ്യാപിച്ചു. 2024 ജൂൺ 05 ന് ന്യൂയോർക്കിലെ നാസൗ കൗണ്ടി ഇൻ്റർനാഷണൽ ക്രിക്കറ്റ് സ്റ്റേഡിയത്തിൽ അയർലൻഡിനെതിരെയാണ് ഇന്ത്യയുടെ ആദ്യ മത്സരം.

2024 ജൂൺ 09 ന് ഇതേ വേദിയിൽ ഇന്ത്യ പാകിസ്ഥാനെ നേരിടും. ജൂൺ 12, 15 തീയതികളിൽ യഥാക്രമം യുഎസ്എയെയും കാനഡയെയും ഇന്ത്യ നേരിടും.

ടീം: രോഹിത് ശർമ (ക്യാപ്റ്റൻ), ഹാർദിക് പാണ്ഡ്യ (വൈസ് ക്യാപ്റ്റൻ), യശസ്വി ജയ്‌സ്വാൾ, വിരാട് കോലി, സൂര്യകുമാർ യാദവ്, ഋഷഭ് പന്ത് (ഡബ്ല്യുകെ), സഞ്ജു സാംസൺ (ഡബ്ല്യുകെ), ശിവം ദുബെ, രവീന്ദ്ര ജഡേജ, അക്സർ പട്ടേൽ, കുൽദീപ് യാദവ്, യുസ്‌വേന്ദ്ര ചാഹൽ, അർഷ്ദീപ് സിംഗ്, ജസ്പ്രീത് ബുംറ, മുഹമ്മദ് സിറാജ്.

റിസർവ് ടീം: ശുഭ്മാൻ ഗിൽ, റിങ്കു സിംഗ്, ഖലീൽ അഹമ്മദ്, അവേഷ് ഖാൻ