ഭീകരവാദ പിന്തുണ അവസാനിപ്പിക്കും വരെ സിന്ധു ജലകരാർ മരവിപ്പിച്ച നിലയിൽ തുടരും; പാകിസ്താനോട് ഇന്ത്യ

ന്യൂഡൽഹി: അതിർത്തിക്കപ്പുറത്തെ ഭീകരവാദത്തിന് പാകിസ്താൻ നൽകുന്ന പിന്തുണ വിശ്വസനീയമായും ശാശ്വതമായും അവസാനിപ്പിക്കും വരെ സിന്ധു ജലകരാർ (Indus Waters Treaty) മരവിപ്പിച്ച നിലയിൽ തുടരുമെന്ന് ഇന്ത്യ വ്യക്തമാക്കി. ഇക്കാര്യത്തിൽ ഇന്ത്യയുടെ നിലപാടിൽ യാതൊരു മാറ്റവുമില്ലെന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ അറിയിച്ചു. 

പാകിസ്താൻ അടുത്തിടെ സിന്ധു ജലകരാറുമായി ബന്ധപ്പെട്ട് നടത്തിയ പരാമർശങ്ങൾക്കും മുന്നറിയിപ്പുകൾക്കുമുള്ള പ്രതികരണമായാണ് ഇന്ത്യയുടെ വിശദീകരണം. ഭീകരവാദത്തിന് പിന്തുണ നൽകുന്നത് പൂർണമായും ഉപേക്ഷിക്കാതെ കരാറിന്റെ കാര്യത്തിൽ മുന്നോട്ടുപോകാനാകില്ലെന്നാണ് ഇന്ത്യയുടെ ആവർത്തിച്ചുള്ള നിലപാട്. 

2025-ലെ പഹൽഗാം ഭീകരാക്രമണത്തിന് പിന്നാലെയാണ് ഇന്ത്യ സിന്ധു ജലകരാർ മരവിപ്പിക്കുന്നതായി പ്രഖ്യാപിച്ചത്. പാകിസ്താൻ ഭീകരവാദത്തിന് പിന്തുണ അവസാനിപ്പിക്കുന്നതുവരെ ഈ നിലപാട് തുടരുമെന്നും വിദേശകാര്യ മന്ത്രാലയം വീണ്ടും വ്യക്തമാക്കി.