ഐഫോൺ 18 പ്രോയ്ക്ക് ഇന്ത്യയിൽ വൻ വില; അമേരിക്കയേക്കാൾ ₹68,000 വരെ അധികം

ആപ്പിൾ പുറത്തിറക്കിയ ഐഫോൺ 18 പ്രോയ്ക്ക് ഇന്ത്യയിൽ അമേരിക്കയേക്കാൾ വലിയ വില വ്യത്യാസമാണ്. ഇന്ത്യയിൽ 256 ജിബി ഐഫോൺ 18 പ്രോയുടെ വില ₹1,64,900 മുതൽ ആരംഭിക്കുമ്പോൾ അമേരിക്കയിൽ ഇതേ മോഡലിന്റെ അടിസ്ഥാന വില 1,199 ഡോളർ ആണ്. പ്രാദേശിക വിൽപ്പന നികുതി ഉൾപ്പെടുത്താതെയുള്ള അമേരിക്കൻ വിലയാണിത്. 

സ്റ്റോറേജ് ശേഷി കൂടുന്നതിനനുസരിച്ച് വില വ്യത്യാസവും വർധിക്കുന്നു. 1 ടിബി പതിപ്പിൽ ഇന്ത്യയും അമേരിക്കയും തമ്മിലുള്ള വ്യത്യാസം ഏകദേശം ₹65,000 വരെയാകുമ്പോൾ ഉയർന്ന സ്റ്റോറേജ് പതിപ്പുകളിൽ അന്തരം ഇനിയും കൂടുന്നു. പ്രോ മാക്സിന്റെ 2 ടിബി പതിപ്പിൽ ഇന്ത്യയിലെ വില ₹4,49,900 വരെ എത്തുന്നു. 

ഇന്ത്യയിലെ ഉയർന്ന ഇറക്കുമതി തീരുവയും നികുതികളുമാണ് പ്രധാനമായും വില വ്യത്യാസത്തിന് കാരണമാകുന്നത്. അമേരിക്കയിലെ വിലയിൽ സംസ്ഥാനത്തിനനുസരിച്ച് ഈടാക്കുന്ന പ്രാദേശിക വിൽപ്പന നികുതി ഉൾപ്പെടുത്തിയിട്ടില്ലെന്നതും ഇന്ത്യ–അമേരിക്ക വില താരതമ്യത്തിൽ ശ്രദ്ധിക്കേണ്ട കാര്യമാണ്. 

ഐഫോൺ 18 പ്രോയിൽ എ20 പ്രോ ചിപ്പ്, പുതിയ 48 മെഗാപിക്സൽ പ്രധാന ക്യാമറ, വ്യത്യസ്ത അപ്പർച്ചർ ക്രമീകരിക്കാവുന്ന ക്യാമറ സംവിധാനം, മെച്ചപ്പെടുത്തിയ ബാറ്ററി പ്രകടനം, പുതിയ എഐ സൗകര്യങ്ങൾ എന്നിവയാണ് പ്രധാന പുതുമകൾ. ഇന്ത്യയിൽ സെപ്റ്റംബർ 12ന് വൈകിട്ട് 5.30 മുതൽ മുൻകൂർ ബുക്കിങ് ആരംഭിക്കുകയും സെപ്റ്റംബർ 18 മുതൽ വിൽപ്പന തുടങ്ങുകയും ചെയ്യും. 

അമേരിക്കയ്ക്ക് പുറമെ യുഎഇ, സിംഗപ്പൂർ തുടങ്ങിയ വിപണികളിലും ഐഫോൺ 18 പ്രോ താരതമ്യേന കുറഞ്ഞ വിലയിൽ ലഭിക്കുന്നതായി വില താരതമ്യങ്ങൾ വ്യക്തമാക്കുന്നു. അതേസമയം വിദേശത്ത് നിന്ന് ഫോൺ വാങ്ങുമ്പോൾ നികുതി, വാറന്റി, പ്രാദേശിക ഉപയോഗവുമായി ബന്ധപ്പെട്ട വ്യവസ്ഥകൾ എന്നിവ കൂടി പരിഗണിക്കേണ്ടതുണ്ട്.