ഖമേനിയുടെ സംസ്കാരച്ചടങ്ങുകൾക്ക് ഇറാൻ സജ്ജം; സുരക്ഷാ ആശങ്കകൾക്കിടെ ആറ് ദിവസത്തെ പൊതുശ്രദ്ധാഞ്ജലി

ടെഹ്റാൻ: അന്തരിച്ച മുൻ പരമോന്നത നേതാവ് ആയത്തുല്ല അലി ഖമേനിയുടെ സംസ്കാരച്ചടങ്ങുകൾക്കായി ഇറാൻ വിപുലമായ ഒരുക്കങ്ങൾ പൂർത്തിയാക്കി. ടെഹ്റാനിൽ ആരംഭിക്കുന്ന ആറ് ദിവസത്തെ പൊതുശ്രദ്ധാഞ്ജലി ചടങ്ങുകളിൽ ലക്ഷക്കണക്കിന് ആളുകൾ പങ്കെടുക്കുമെന്നാണ് ഭരണകൂടത്തിന്റെ പ്രതീക്ഷ. സുരക്ഷാ ആശങ്കകൾ നിലനിൽക്കുന്ന സാഹചര്യത്തിൽ രാജ്യവ്യാപകമായി കർശന സുരക്ഷാ ക്രമീകരണങ്ങളും ഏർപ്പെടുത്തിയിട്ടുണ്ട്. 

ടെഹ്റാനിൽ പൊതുദർശനത്തിന് വെക്കുന്ന ഖമേനിയുടെ ഭൗതികശരീരം പിന്നീട് വിവിധ മതപരമായ ചടങ്ങുകൾക്ക് ശേഷം മഷ്ഹദിലെ ഇമാം റെസാ ദർഗയ്ക്കു സമീപം സംസ്കരിക്കും. ഷിയാ വിശ്വാസത്തിന്റെ പ്രതീകാത്മക കേന്ദ്രങ്ങളുമായി ബന്ധപ്പെട്ട ചടങ്ങുകളും സംസ്കാരപരിപാടിയുടെ ഭാഗമാകും. 

ഖമേനിയുടെ മരണത്തിന് പിന്നാലെ രാജ്യത്തിനകത്തും മേഖലയിലും നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ, ഈ ചടങ്ങുകൾ ദേശീയ ഐക്യത്തിന്റെയും ഭരണകൂടത്തിന്റെ ശക്തിപ്രകടനത്തിന്റെയും വേദിയാക്കാനാണ് ഇറാൻ ശ്രമിക്കുന്നത്. ചടങ്ങുകളിൽ വിദേശ പ്രതിനിധികളും പ്രാദേശിക സഖ്യരാജ്യങ്ങളിലെ നേതാക്കളും പങ്കെടുക്കുമെന്നാണ് റിപ്പോർട്ടുകൾ.