ട്രംപിന്റെ അന്ത്യശാസനം തള്ളി ഇറാൻ; ഹോർമുസ് കടലിടുക്കിൽ ഒമാന്റെ പുതിയ നിർദേശം, ചെലവ് വഹിക്കാൻ യൂറോപ്പും പരിഗണനയിൽ

ഹോർമുസ് കടലിടുക്കിലെ സുരക്ഷ ഉറപ്പാക്കണമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ അന്ത്യശാസനം ഇറാൻ തള്ളിക്കളഞ്ഞതായി റിപ്പോർട്ടുകൾ. ഇതിനിടെ, പ്രതിസന്ധി പരിഹരിക്കാൻ ഒമാൻ പുതിയ കരട് നിർദേശം മുന്നോട്ടുവെച്ചിട്ടുണ്ട്. അതേസമയം, നിർണായക സമുദ്രപാതയിൽ സുരക്ഷയും കപ്പൽഗതാഗതവും ഉറപ്പാക്കുന്നതിനുള്ള ചെലവിന്റെ ഒരു ഭാഗം വഹിക്കുന്ന സാധ്യത യൂറോപ്യൻ രാജ്യങ്ങൾ പരിഗണിക്കുന്നതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

ഒമാന്റെ നിർദേശപ്രകാരം, ഒമാന്റെ സമുദ്രാതിർത്തിയിലുള്ള തെക്കൻ പാതയിലൂടെ കപ്പലുകൾക്ക് സ്വതന്ത്രമായി സഞ്ചരിക്കാനാകും. ഇറാന്റെ സമുദ്രാതിർത്തിയിലുള്ള വടക്കൻ പാത ഉപയോഗിക്കുന്ന കപ്പലുകൾക്ക് മുൻകൂർ അനുമതി വേണമെന്ന വ്യവസ്ഥയാണ് കരടിലുള്ളതെന്ന് റിപ്പോർട്ടുകൾ സൂചിപ്പിക്കുന്നു. നിലവിലെ കരടിൽ കപ്പലുകളിൽ നിന്ന് ടോൾ ഈടാക്കുന്ന നിർദേശം ഉൾപ്പെടുത്തിയിട്ടില്ല.

പശ്ചിമേഷ്യയിലെ സംഘർഷം രൂക്ഷമായ സാഹചര്യത്തിൽ ഹോർമുസ് കടലിടുക്കിന്റെ നിയന്ത്രണവും സുരക്ഷയും ആഗോള നയതന്ത്ര ചർച്ചകളിലെ പ്രധാന വിഷയമായി മാറിയിരിക്കുകയാണ്. ലോക എണ്ണവിതരണത്തിലെ നിർണായക പാതയായ ഹോർമുസിലെ അനിശ്ചിതത്വം അന്താരാഷ്ട്ര ഊർജ വിപണിയിലും കപ്പൽഗതാഗത മേഖലയിലും ആശങ്ക ഉയർത്തുന്നുണ്ട്.