അമേരിക്കൻ ആക്രമണത്തിന് പിന്നാലെ ബഹ്റൈനിലെ യുഎസ് നാവിക താവളത്തിന് നേരെ ഡ്രോൺ ആക്രമണമെന്ന് ഇറാൻ
മേഖലയിൽ സംഘർഷം രൂക്ഷം
Jun 10, 2026, 08:56 IST
മനാമ: അമേരിക്ക നടത്തിയ പുതിയ സൈനിക ആക്രമണങ്ങൾക്ക് മറുപടിയായി ബഹ്റൈനിലെ യുഎസ് നാവികസേനയുടെ അഞ്ചാം ഫ്ലീറ്റ് ആസ്ഥാനത്തിന് നേരെ ഡ്രോൺ ആക്രമണം നടത്തിയതായി ഇറാൻ അവകാശപ്പെട്ടു. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) ആണ് ആക്രമണത്തിന്റെ ഉത്തരവാദിത്തം ഏറ്റെടുത്തത്.
ഹോർമുസ് കടലിടുക്കിന് സമീപം ഒരു അമേരിക്കൻ അപ്പാച്ചെ ഹെലികോപ്റ്റർ തകർക്കപ്പെട്ട സംഭവത്തെ തുടർന്ന് യുഎസ് ഇറാനിലെ റഡാർ, വ്യോമപ്രതിരോധ കേന്ദ്രങ്ങൾ എന്നിവയ്ക്കെതിരെ ആക്രമണം നടത്തിയിരുന്നു. ഇതിന് പിന്നാലെയാണ് ബഹ്റൈനിലെ യുഎസ് സൈനിക കേന്ദ്രങ്ങൾ ലക്ഷ്യമിട്ട് ഇറാൻ തിരിച്ചടിച്ചതായി റിപ്പോർട്ടുകൾ പുറത്തുവന്നത്.
ബഹ്റൈനിലുള്ള യുഎസ് നാവികസേനയുടെ അഞ്ചാം ഫ്ലീറ്റ് ആസ്ഥാനത്ത് സ്ഫോടനം നടന്നതായി ദൃശ്യങ്ങൾ പുറത്തുവന്നിട്ടുണ്ട്. എന്നാൽ ആക്രമണത്തിൽ ഉണ്ടായ നാശനഷ്ടങ്ങളെയോ ആളപായത്തെയോ കുറിച്ച് ഔദ്യോഗിക സ്ഥിരീകരണം ലഭിച്ചിട്ടില്ല.
അതേസമയം, ഇറാൻ ബഹ്റൈനിനും കുവൈത്തിനുമെതിരേ മിസൈൽ, ഡ്രോൺ ആക്രമണങ്ങൾ നടത്തിയതായി നേരത്തെയും അവകാശപ്പെട്ടിരുന്നുവെങ്കിലും, പല ആക്രമണങ്ങളും യുഎസ്-ബഹ്റൈൻ വ്യോമപ്രതിരോധ സംവിധാനങ്ങൾ തകർത്തതായി അമേരിക്കൻ സെൻട്രൽ കമാൻഡ് (CENTCOM) വ്യക്തമാക്കിയിരുന്നു.
ഇറാന്റെ തിരിച്ചടിക്കൊപ്പം ജോർദാൻ, കുവൈത്ത് എന്നിവിടങ്ങളിലെ അമേരിക്കൻ സൈനിക കേന്ദ്രങ്ങൾക്കും ഭീഷണി ഉയർന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. മേഖലയിലെ സംഘർഷം വ്യാപിക്കുന്നതോടെ എണ്ണവിലയിലും ആഗോള വിപണികളിലും ആശങ്ക ശക്തമായിട്ടുണ്ട്.
അമേരിക്കയും ഇറാനും തമ്മിലുള്ള ഏറ്റുമുട്ടൽ കൂടുതൽ രൂക്ഷമാകുന്ന സാഹചര്യത്തിൽ പശ്ചിമേഷ്യയിലെ സുരക്ഷാ സ്ഥിതിഗതികൾ വീണ്ടും അനിശ്ചിതത്വത്തിലായിരിക്കുകയാണ്.
