ട്രംപ്–നെതന്യാഹു വീണ്ടും ഭിന്നതയിൽ? സിറിയയിലെ ഇസ്രയേൽ ആക്രമണം യുഎസ്–ഇസ്രയേൽ ബന്ധത്തിൽ വിള്ളൽ ശക്തമാക്കുന്നു

വാഷിങ്ടൺ: സിറിയയിലെ അബു അൽ-ദുഹൂർ വ്യോമതാവളത്തിന് നേരെ ഇസ്രയേൽ നടത്തിയ വ്യോമാക്രമണത്തെച്ചൊല്ലി അമേരിക്കയും ഇസ്രയേലും തമ്മിലുള്ള അഭിപ്രായവ്യത്യാസം ശക്തമാകുന്നു. ആക്രമണം മേഖലയിൽ അനാവശ്യമായ സംഘർഷം വർധിപ്പിക്കുന്ന നടപടിയാണെന്നായിരുന്നു യുഎസ് നിലപാട്. 

ഓഗസ്റ്റ് 18നാണ് വടക്കുപടിഞ്ഞാറൻ സിറിയയിലെ വ്യോമതാവളത്തിൽ ഇസ്രയേൽ ആക്രമണം നടത്തിയത്. തുർക്കി സൈനിക സാന്നിധ്യം അവിടെ സ്ഥാപിക്കാനുള്ള നീക്കം തടയാനാണ് ആക്രമണമെന്നാണ് ഇസ്രയേലിന്റെ വിശദീകരണം. എന്നാൽ തുർക്കി ഈ ആരോപണം നിഷേധിച്ചു. 

പ്രാദേശിക സംഘർഷം ഒഴിവാക്കാൻ അമേരിക്ക ഇസ്രയേൽ, സിറിയ, തുർക്കി എന്നിവർക്കിടയിൽ ആശയവിനിമയ സംവിധാനം രൂപീകരിക്കാൻ ശ്രമിക്കുന്നതിനിടെയാണ് ഇസ്രയേൽ ആക്രമണം നടത്തിയത്. യുഎസ് പ്രത്യേക ദൂതൻ ടോം ബാരക്ക് ആക്രമണത്തെ ‘അനാവശ്യമായ സംഘർഷവർധന’ എന്നാണ് വിശേഷിപ്പിച്ചത്. 

ഇസ്രയേലിൽ തിരഞ്ഞെടുപ്പ് അടുത്തിരിക്കെ നെതന്യാഹു സർക്കാർ സ്വീകരിക്കുന്ന സൈനിക നടപടികളെക്കുറിച്ചും അമേരിക്കൻ ഉദ്യോഗസ്ഥർക്കിടയിൽ ആശങ്കയുണ്ടെന്നാണ് റിപ്പോർട്ട്. സിറിയൻ വിഷയത്തിൽ ട്രംപ് ഭരണകൂടം സംഘർഷം കുറയ്ക്കാൻ ശ്രമിക്കുമ്പോൾ ഇസ്രയേൽ കൂടുതൽ കടുത്ത നിലപാട് സ്വീകരിക്കുന്നതാണ് ഇരുരാജ്യങ്ങൾക്കുമിടയിലെ ഭിന്നതയ്ക്ക് കാരണമാകുന്നത്.