മനുഷ്യ മസ്തിഷ്കം ഒറ്റ അവയവമല്ലേ? 55 കോടി വർഷം പിന്നിലേക്ക് എത്തുന്ന നിർണായക കണ്ടെത്തൽ

മനുഷ്യ മസ്തിഷ്കത്തിന്റെ ഉത്ഭവത്തെക്കുറിച്ചുള്ള ശാസ്ത്രലോകത്തിന്റെ ദീർഘകാല ധാരണകളെ ചോദ്യം ചെയ്യുന്ന പുതിയ കണ്ടെത്തലുമായി ഗവേഷകർ. മസ്തിഷ്കം ഒരു ഏകീകൃത അവയവമായി രൂപപ്പെട്ടതല്ലെന്നും, പരിണാമത്തിന്റെ വളരെ പുരാതന ഘട്ടങ്ങളിൽ സ്വതന്ത്രമായി വികസിച്ച രണ്ട് വ്യത്യസ്ത നാഡീവ്യവസ്ഥകൾ പിന്നീട് ഒരുമിച്ച് പ്രവർത്തിക്കുന്ന രീതിയിലേക്ക് മാറിയതാകാമെന്നുമാണ് സ്റ്റാൻഫോർഡ് മെഡിസിൻ നേതൃത്വത്തിലുള്ള പഠനം വ്യക്തമാക്കുന്നത്. ഏകദേശം 55 കോടി വർഷത്തെ പരിണാമചരിത്രത്തിലേക്കാണ് ഈ കണ്ടെത്തൽ ഗവേഷകരെ എത്തിക്കുന്നത്.

ഭ്രൂണവികസനത്തിന്റെ ആദ്യഘട്ടങ്ങൾ പരിശോധിച്ചാണ് ഗവേഷകർ നിർണായക തെളിവുകൾ കണ്ടെത്തിയത്. മസ്തിഷ്കത്തിന്റെ മുൻഭാഗമായ ഫോർബ്രെയിനും മിഡ്ബ്രെയിനും രൂപപ്പെടുന്ന കോശങ്ങളും പിന്നിലെ ഹിൻഡ്ബ്രെയിൻ രൂപപ്പെടുന്ന കോശങ്ങളും തുടക്കത്തിൽ തന്നെ രണ്ട് വ്യത്യസ്ത കോശസ്രോതസ്സുകളിൽ നിന്നാണ് വികസിക്കുന്നതെന്ന് പഠനം കണ്ടെത്തി. Otx2, Gbx2 എന്നീ ജീനുകളുമായി ബന്ധപ്പെട്ട വ്യത്യസ്ത പ്രോജെനിറ്റർ കോശങ്ങളാണ് ഈ രണ്ട് വികസനപാതകൾക്ക് പിന്നിലെന്നും ഗവേഷകർ വ്യക്തമാക്കി.

മനുഷ്യരിൽ മാത്രമല്ല, മറ്റ് ജീവികളിലും ഇതേ മാതൃകയുടെ തെളിവുകൾ ഗവേഷകർ കണ്ടെത്തി. കോഴി, സീബ്രാഫിഷ് തുടങ്ങിയ ജീവികളിലും ഈ രണ്ട് ഉത്ഭവപാതകളുടെ സാന്നിധ്യം കണ്ടെത്തിയതോടൊപ്പം മനുഷ്യരിൽ നിന്ന് വളരെ അകലെയുള്ള പരിണാമശാഖയിലെ acorn worm-ലും സമാനമായ ഘടനയുടെ സൂചനകൾ ലഭിച്ചു. അതായത്, മസ്തിഷ്കത്തിന്റെ ഈ രണ്ട്-ഉത്ഭവ മാതൃക വളരെ പുരാതനമായ പരിണാമഘട്ടത്തിൽ തന്നെ രൂപപ്പെട്ടിരിക്കാമെന്നാണ് പഠനം സൂചിപ്പിക്കുന്നത്.

കണ്ടെത്തലിന് ചികിത്സാ ഗവേഷണത്തിലും വലിയ പ്രാധാന്യമുണ്ടാകാമെന്നാണ് ശാസ്ത്രജ്ഞരുടെ വിലയിരുത്തൽ. മനുഷ്യന്റെ ഹിൻഡ്ബ്രെയിൻ മോട്ടോർ ന്യൂറോണുകൾ ലബോറട്ടറിയിൽ ആദ്യമായി പ്രവർത്തനക്ഷമമായി വികസിപ്പിക്കാനും ഗവേഷകർക്ക് കഴിഞ്ഞു. മസ്തിഷ്കത്തിന്റെ ഈ ഭാഗത്തെ ബാധിക്കുന്ന സ്പൈനൽ മസ്കുലർ അട്രോഫി (SMA), ALS തുടങ്ങിയ രോഗങ്ങളെ കൂടുതൽ കൃത്യമായി പഠിക്കുന്നതിനും ഭാവിയിലെ ചികിത്സാ ഗവേഷണങ്ങൾ വികസിപ്പിക്കുന്നതിനും ഈ മാതൃക സഹായിച്ചേക്കാം. പഠനം സെപ്റ്റംബർ 18ന് Nature Neuroscience-ൽ പ്രസിദ്ധീകരിച്ചു.