ജയ് ശ്രീറാം, ഞാൻ പൂർണമായും ദൈവത്തിൽ വിശ്വസിക്കുന്നു'; വിവാദങ്ങൾക്ക് മറുപടിയുമായി നയൻതാര
'അന്നപൂരണി' എന്ന ചിത്രവുമായി ബന്ധപ്പെട്ടുണ്ടായ വിവാദങ്ങളിൽ ക്ഷമാപണം നടത്തി നടി നയൻതാര. തന്റെ ഇൻസ്റ്റാഗ്രാം പേജിലൂടെയാണ് നടി വിവിധ ഭാഷകളിൽ ക്ഷമാപണ കുറിപ്പുകൾ പങ്കുവെച്ചത്. താൻ ദൈവത്തിൽ വിശ്വസിക്കുന്ന ആളാണെന്നും ആരുടെയും മതവികാരം വ്രണപ്പെടുത്താൻ ഉദ്ദേശിച്ചിട്ടില്ലെന്നും നടി തന്റെ കുറിപ്പിൽ പറയുന്നു.
'ജയ് ശ്രീറാം' എന്ന തലക്കെട്ടോടെയാണ് കുറിപ്പ് തുടങ്ങുന്നത്. താൻ ആരുടെയും വിശ്വാസത്തെ ഹനിക്കാൻ ശ്രമിച്ചിട്ടില്ലെന്നും പ്രതികൂല സാഹചര്യങ്ങളിലും തളരാതെ മുന്നോട്ട് പോകാമെന്ന സന്ദേശമാണ് സിനിമ നൽകുന്നതെന്നും നടി വ്യക്തമാക്കി. സെൻസർ ബോർഡ് അംഗീകരിച്ച ചിത്രം ഒടിടി പ്ലാറ്റ്‌ഫോമിൽ നിന്ന് പിൻവലിച്ചത് തന്നെ അത്ഭുതപ്പെടുത്തിയെന്നും നയൻതാര വ്യക്തമാക്കി.
ഒരു നല്ല സന്ദേശം പങ്കിടാനുള്ള ഞങ്ങളുടെ ആത്മാർത്ഥമായ ശ്രമത്തിൽ, ഞങ്ങൾ അശ്രദ്ധമായി ഉപദ്രവിച്ചേക്കാം. മുമ്പ് തിയേറ്ററുകളിൽ പ്രദർശിപ്പിച്ച സെൻസർ ചെയ്‌ത സിനിമ OTT പ്ലാറ്റ്‌ഫോമിൽ നിന്ന് നീക്കം ചെയ്യുമെന്ന് ഞങ്ങൾ പ്രതീക്ഷിച്ചിരുന്നില്ല. ഞാനും എന്റെ ടീമും ഒരിക്കലും ആരുടെയും വികാരങ്ങളെ വ്രണപ്പെടുത്താൻ ഉദ്ദേശിച്ചിട്ടില്ല, ഈ പ്രശ്നത്തിന്റെ ഗൗരവം ഞങ്ങൾ മനസ്സിലാക്കുന്നു.
പൂർണ്ണമായി ദൈവത്തിൽ വിശ്വസിക്കുകയും രാജ്യത്തുടനീളമുള്ള ക്ഷേത്രങ്ങൾ പതിവായി സന്ദർശിക്കുകയും ചെയ്യുന്ന ഒരാളെന്ന നിലയിൽ ഞാൻ മനഃപൂർവ്വം ചെയ്യുന്ന അവസാന കാര്യമാണ്. ഞങ്ങളുടെ വികാരങ്ങൾ സ്പർശിച്ചവരോട് ഞാൻ എന്റെ ആത്മാർത്ഥവും ഹൃദയംഗമവുമായ ക്ഷമാപണം നടത്തുന്നു.
ക്ഷേത്രത്തിലെ പൂജാരിയുടെ മകളായ അന്നപൂർണി രംഗരാജന്റെ വേഷമാണ് ചിത്രത്തിൽ നയൻതാര അവതരിപ്പിച്ചത്. ശ്രീരാമൻ മാംസം കഴിച്ചെന്ന് അവകാശപ്പെട്ട് മാംസം മുറിക്കാൻ നയൻതാരയുടെ കഥാപാത്രത്തെ സ്വാധീനിക്കുന്ന ഒരു രംഗം കാണിച്ചതിനെ തുടർന്ന് ചിത്രം വിവാദമായി. ബിരിയാണി പാകം ചെയ്യുന്നതിനുമുമ്പ് നായിക ഹിജാബ് ധരിച്ച് നമസ്‌കരിക്കുന്ന മറ്റൊരു രംഗവും സിനിമയിലുണ്ടായിരുന്നു. ഹിന്ദു സംഘടനകളുടെ പ്രതിഷേധത്തെ തുടർന്ന് ചിത്രം നെറ്റ്ഫ്ലിക്സിൽ നിന്ന് നീക്കം ചെയ്തു. നയൻതാരയ്‌ക്കെതിരെയും പോലീസ് കേസെടുത്തിരുന്നു.
