അമ്മയിൽ വീണ്ടും 'ജിഹാദി' പരാമർശ വിവാദം; ലക്ഷ്മിപ്രിയയ്ക്കെതിരെ ഉഷ ഹസീനയുടെ ഗുരുതര ആരോപണം

കൊച്ചി: മലയാള സിനിമാ താരസംഘടനയായ 'അമ്മ'യിൽ (AMMA) വീണ്ടും 'ജിഹാദി' പരാമർശവുമായി ബന്ധപ്പെട്ട വിവാദം ഉയർന്നു. നടി ഉഷ ഹസീന, നടി ലക്ഷ്മിപ്രിയ തനിക്കെതിരെ 'ജിഹാദി' പരാമർശം നടത്തിയെന്നും മതത്തിന്റെ പേരിൽ അപമാനിച്ചെന്നും ആരോപിച്ച് രംഗത്തെത്തി. 

ഉഷ ഹസീനയുടെ ആരോപണം പുറത്തുവന്നതോടെ 'അമ്മ'യിലെ ആഭ്യന്തര തർക്കം കൂടുതൽ രൂക്ഷമായിരിക്കുകയാണ്. അടുത്തിടെ നടി അൻസിബ ഹസൻ നടൻ ടിനി ടോം തന്നെ 'ജിഹാദി' എന്ന് വിളിച്ചുവെന്ന ഗുരുതര ആരോപണം ഉന്നയിച്ചതിന് പിന്നാലെയാണ് സമാന സ്വഭാവത്തിലുള്ള മറ്റൊരു പരാതി കൂടി ഉയർന്നിരിക്കുന്നത്. 

മതപരമായ അധിക്ഷേപവും വ്യക്തിഹത്യയും അംഗീകരിക്കാനാകില്ലെന്നും, ഇത്തരം പരാമർശങ്ങൾ സമൂഹത്തിൽ തെറ്റായ സന്ദേശമാണ് നൽകുന്നതെന്നും ഉഷ ഹസീന പ്രതികരിച്ചു. സംഭവത്തിൽ സംഘടനയുടെ നേതൃത്വവും വ്യക്തമായ നിലപാട് സ്വീകരിക്കണമെന്നാണ് ആവശ്യം. 

അടുത്തിടെ അൻസിബ ഹസൻ ഉന്നയിച്ച ആരോപണങ്ങളും സംഘടനയിലെ ആഭ്യന്തര പ്രശ്നങ്ങളും കാരണം 'അമ്മ' വലിയ വിമർശനങ്ങൾ നേരിടുന്ന സാഹചര്യത്തിലാണ് പുതിയ ആരോപണം കൂടി ഉയർന്നിരിക്കുന്നത്. ഇതോടെ സംഘടനയ്ക്കുള്ളിലെ പ്രതിസന്ധി കൂടുതൽ സങ്കീർണമാകുമെന്ന വിലയിരുത്തലാണ് ഉയരുന്നത്.