മോസ്കോ എണ്ണശുദ്ധീകരണശാലയിൽ വൻ തീപിടിത്തം; യുക്രെയ്നിന്റെ വ്യാപക ഡ്രോൺ ആക്രമണമെന്ന് റഷ്യ
റഷ്യയുടെ തലസ്ഥാനമായ മോസ്കോയിലെ പ്രധാന എണ്ണശുദ്ധീകരണശാലയിൽ വൻ തീപിടിത്തം. യുക്രെയ്ൻ നടത്തിയ വ്യാപക ഡ്രോൺ ആക്രമണത്തെ തുടർന്നാണ് തീപിടിത്തമുണ്ടായതെന്ന് റഷ്യൻ അധികൃതർ അറിയിച്ചു. മോസ്കോയുടെ തെക്കുകിഴക്കൻ ഭാഗത്തുള്ള ഗാസ്പ്രോം നെഫ്റ്റിന്റെ കാപോട്ട്ന്യ (Kapotnya) എണ്ണശുദ്ധീകരണശാലയാണ് ആക്രമണത്തിന് ഇരയായത്. ഇത് മോസ്കോ മേഖലയിലെ പ്രധാന ഇന്ധന വിതരണ കേന്ദ്രങ്ങളിലൊന്നാണ്.
ആക്രമണത്തെ തുടർന്ന് ശുദ്ധീകരണശാലയിൽ കനത്ത തീപിടിത്തമുണ്ടാകുകയും കറുത്ത പുക നഗരത്തിന്റെ വിവിധ ഭാഗങ്ങളിൽ വ്യാപിക്കുകയും ചെയ്തു. സുരക്ഷാ മുൻകരുതലിന്റെ ഭാഗമായി മോസ്കോയിലെ നാല് പ്രധാന വിമാനത്താവളങ്ങളിലെ സർവീസുകൾ താൽക്കാലികമായി തടസ്സപ്പെട്ടു. നിരവധി യുക്രെയ്ൻ ഡ്രോണുകൾ റഷ്യൻ വ്യോമപ്രതിരോധ സംവിധാനം തകർത്തതായി റഷ്യ അവകാശപ്പെട്ടെങ്കിലും ചിലത് ലക്ഷ്യസ്ഥാനങ്ങളിൽ പതിച്ചതായാണ് റിപ്പോർട്ടുകൾ.
റഷ്യൻ പ്രതിരോധ മന്ത്രാലയത്തിന്റെ കണക്ക് പ്രകാരം നൂറുകണക്കിന് യുക്രെയ്ൻ ഡ്രോണുകളാണ് വിവിധ മേഖലകളിലേക്ക് എത്തിയത്. അതേസമയം, റഷ്യയുടെ യുദ്ധശേഷിക്ക് സാമ്പത്തിക പിന്തുണ നൽകുന്ന എണ്ണ-ഊർജ അടിസ്ഥാനസൗകര്യങ്ങളെയാണ് ലക്ഷ്യമിടുന്നതെന്ന് യുക്രെയ്ൻ പ്രസിഡന്റ് വൊളൊദിമിർ സെലെൻസ്കി വ്യക്തമാക്കി. സമീപകാലത്ത് റഷ്യൻ എണ്ണശുദ്ധീകരണശാലകൾക്കെതിരായ യുക്രെയ്ൻ ആക്രമണങ്ങൾ വർധിച്ചിരിക്കുകയാണ്.
സംഭവത്തിന്റെ നാശനഷ്ടങ്ങൾ സംബന്ധിച്ച ഔദ്യോഗിക കണക്ക് പുറത്തുവന്നിട്ടില്ല. തീ അണയ്ക്കാനുള്ള ശ്രമങ്ങൾ തുടരുകയാണെന്നും എണ്ണശുദ്ധീകരണശാലയുടെ പ്രവർത്തനം താൽക്കാലികമായി തടസ്സപ്പെട്ടതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. റഷ്യ–യുക്രെയ്ൻ യുദ്ധം തുടരുന്നതിനിടെ ഇരുരാജ്യങ്ങളും പരസ്പര ആക്രമണങ്ങൾ ശക്തമാക്കുന്ന സാഹചര്യത്തിലാണ് പുതിയ സംഭവം.
