മോസ്കോ ലക്ഷ്യമിട്ട് 400-ലേറെ ഡ്രോണുകൾ; യുക്രൈന്റെ ഏറ്റവും വലിയ ആക്രമണമെന്ന് റഷ്യ
മോസ്കോ: മോസ്കോയും പരിസര പ്രദേശങ്ങളും ലക്ഷ്യമാക്കി യുക്രൈൻ 400-ലധികം ഡ്രോണുകൾ ഉപയോഗിച്ച് വൻ ആക്രമണം നടത്തിയതായി റഷ്യ അവകാശപ്പെട്ടു. യുക്രൈൻ യുദ്ധം ആരംഭിച്ചതിന് ശേഷം തലസ്ഥാന മേഖലയെ ലക്ഷ്യമിട്ട ഏറ്റവും വലിയ ഡ്രോൺ ആക്രമണങ്ങളിലൊന്നാണിതെന്ന് റഷ്യൻ അധികൃതർ അറിയിച്ചു.
റഷ്യൻ വ്യോമപ്രതിരോധ സംവിധാനം ഭൂരിഭാഗം ഡ്രോണുകളും തകർത്തതായി അധികൃതർ വ്യക്തമാക്കി. ആക്രമണത്തിൽ രണ്ട് പേർക്ക് പരിക്കേറ്റതായും ചില സ്ഥലങ്ങളിൽ തീപിടിത്തവും അടിസ്ഥാന സൗകര്യങ്ങൾക്ക് നാശനഷ്ടവും ഉണ്ടായതായും റിപ്പോർട്ടുകളുണ്ട്. സുരക്ഷാ മുൻകരുതലിന്റെ ഭാഗമായി മോസ്കോ മേഖലയിലെ ചില വിമാനത്താവളങ്ങളുടെ പ്രവർത്തനവും താൽക്കാലികമായി തടസ്സപ്പെട്ടു.
അടുത്തിടെ റഷ്യ യുക്രൈനിൽ നടത്തിയ ശക്തമായ മിസൈൽ-ഡ്രോൺ ആക്രമണങ്ങൾക്ക് പിന്നാലെയാണ് ഈ പ്രത്യാക്രമണം. സംഭവത്തെക്കുറിച്ച് യുക്രൈൻ ഔദ്യോഗികമായി പ്രതികരിച്ചിട്ടില്ല.
