ഹയർ സെക്കൻഡറി പരീക്ഷകൾ നടത്താൻ പണമില്ല

തിരുവനന്തപുരം: ഹയർ സെക്കൻഡറി പൊതു പരീക്ഷകൾ നടത്താൻ വിദ്യാഭ്യാസ വകുപ്പിന് പണമില്ല. മാർച്ചിൽ നടക്കാനിരിക്കുന്ന പരീക്ഷ നടത്തുന്നതിനുള്ള ചെലവുകൾ സ്വന്തം അക്കൗണ്ടുകളിൽ നിന്ന് വഹിക്കാൻ പൊതുവിദ്യാഭ്യാസ ഡയറക്ടർ സ്കൂളുകൾക്ക് നിർദ്ദേശം നൽകി.

പരീക്ഷകൾ നടത്തുന്നതിനായി സൂക്ഷിച്ചിരുന്ന പണം വഴിതിരിച്ചുവിട്ടതിനെ തുടർന്നാണ് പ്രതിസന്ധി ഉണ്ടായതെന്ന് ആരോപണമുണ്ട്. സ്കൂളുകൾക്ക് പരീക്ഷകൾ മുൻകൂട്ടി നടത്താൻ പണം അനുവദിക്കുമായിരുന്നു. പരീക്ഷയ്ക്ക് ശേഷം അധിക തുക ഉണ്ടെങ്കിൽ അത് തിരികെ നൽകണം.

എന്നാൽ ഇത്തവണ അങ്ങനെയല്ല. ഒന്നും രണ്ടും വർഷ ഹയർ സെക്കൻഡറി പരീക്ഷകളും ഇംപ്രൂവ്മെന്റ് പരീക്ഷകളും നടത്താൻ വിദ്യാഭ്യാസ വകുപ്പിന് പണമില്ല. പരീക്ഷകൾ നടത്തുന്നതിനായി ഡയറക്ടറേറ്റിൽ നീക്കിവച്ചിരിക്കുന്ന ഹെഡ് ഓഫ് അക്കൗണ്ട് കാലിയായതാണ് കാരണം.

അതിനാൽ മറ്റ് ആവശ്യങ്ങൾക്കായി നീക്കിവച്ചിരിക്കുന്ന പിഡി അക്കൗണ്ടുകളിൽ നിന്ന് പണം എടുത്ത് പരീക്ഷകൾ നടത്താൻ പൊതുവിദ്യാഭ്യാസ ഡയറക്ടർ സ്കൂളുകൾക്ക് നിർദ്ദേശം നൽകിയിട്ടുണ്ട്. സർക്കാരിൽ നിന്ന് ഫണ്ട് ലഭിച്ചാലുടൻ ഫണ്ട് പിഡി അക്കൗണ്ടിലേക്ക് തിരികെ നൽകണമെന്നും സർക്കുലറിൽ പറയുന്നു.

പൊതു പരീക്ഷകൾക്ക് കുട്ടികളിൽ നിന്ന് സർക്കാർ പ്രത്യേക ഫീസ് ഈടാക്കുന്നു. ഇങ്ങനെ ശേഖരിക്കുന്ന പണം ഡയറക്ടറേറ്റിലെ അക്കൗണ്ട് ഹെഡ്ഡിലാണ് എത്തുന്നത്. എന്നിട്ടും പണമില്ലെന്ന് പറയുന്നതിൽ ദുരൂഹതയുണ്ടെന്ന് ഒരു വിഭാഗം അധ്യാപകർ വാദിക്കുന്നു. പരീക്ഷയ്ക്ക് വേണ്ടിയുള്ള പണം ദുരുപയോഗം ചെയ്തതാണ് പ്രതിസന്ധിക്ക് കാരണമെന്നും ആരോപണമുണ്ട്.