ഇന്ത്യയിൽ പുതിയ H1N1 വകഭേദമില്ല; പരിഭ്രാന്തി വേണ്ടെന്ന് ICMR

ഇന്ത്യയിൽ ഇപ്പോൾ പടരുന്ന H1N1 ഇൻഫ്ലുവൻസ വൈറസ് പുതിയ വകഭേദമല്ലെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR). നിലവിൽ പ്രചരിക്കുന്ന വൈറസ് 2025 മുതൽ തന്നെ ഇന്ത്യയിൽ കണ്ടെത്തിയിട്ടുള്ളതാണെന്നും ഇതിൽ അസാധാരണമായ മാറ്റങ്ങളൊന്നും കണ്ടെത്തിയിട്ടില്ലെന്നും ICMR ശാസ്ത്രജ്ഞർ വ്യക്തമാക്കി.

ഇന്ത്യയിൽ നിലവിൽ പ്രചരിക്കുന്ന Influenza A (H1N1) pdm09 വൈറസുകൾ A/Missouri/11/2025 (H1N1) pdm09-like വൈറസിനോട് സാമ്യമുള്ളവയാണ്. ഇവ clade 6B.1A.5a2a, subclade D.3.1.1 വിഭാഗത്തിൽപ്പെടുന്നു. 2025 മുതൽ തന്നെ ഇവയുടെ സാന്നിധ്യം കണ്ടെത്തിയിട്ടുണ്ടെന്നും ICMR അറിയിച്ചു.

നിലവിലെ വൈറസ് സീസണൽ ഇൻഫ്ലുവൻസയുടെ ഭാഗമാണെന്നും വടക്കൻ അർധഗോളത്തിനായി ശുപാർശ ചെയ്യുന്ന വാക്സിൻ ഘടകങ്ങളുമായി നിലവിൽ പ്രചരിക്കുന്ന വൈറസ് സ്ട്രെയിനുകൾക്ക് നല്ല പൊരുത്തമുണ്ടെന്നും വിദഗ്ധർ വ്യക്തമാക്കി. അതിനാൽ പുതിയതോ കൂടുതൽ അപകടകാരിയായതോ ആയ H1N1 വൈറസ് ഇന്ത്യയിൽ പടരുന്നു എന്ന ആശങ്കയ്ക്ക് അടിസ്ഥാനമില്ല.

പനി, ചുമ, തലവേദന, ശരീരവേദന തുടങ്ങിയവയാണ് സാധാരണ ലക്ഷണങ്ങൾ. സീസണൽ ഇൻഫ്ലുവൻസ പൊതുവെ സ്വയം ഭേദമാകുന്ന രോഗമാണെന്നും മതിയായ വിശ്രമവും ആവശ്യമായ പരിചരണവും ലഭിച്ചാൽ ഭൂരിഭാഗം പേരും സുഖം പ്രാപിക്കുമെന്നും ICMR വ്യക്തമാക്കി.

എന്നാൽ ചെറിയ കുട്ടികൾ, പ്രായമായവർ, മറ്റ് ആരോഗ്യപ്രശ്നങ്ങളുള്ളവർ എന്നിവർക്ക് ഇൻഫ്ലുവൻസ മൂലം സങ്കീർണതകൾ ഉണ്ടാകാനുള്ള സാധ്യത കൂടുതലാണ്. ലക്ഷണങ്ങൾ തുടർന്നാൽ, വഷളായാൽ, അല്ലെങ്കിൽ ഗുരുതരമാകുകയാണെങ്കിൽ ഡോക്ടറുടെ ഉപദേശം തേടണമെന്ന് ആരോഗ്യവിദഗ്ധർ നിർദേശിക്കുന്നു.

രാജ്യത്തെ ഇൻഫ്ലുവൻസ സാഹചര്യം ആരോഗ്യ അധികൃതർ നിരീക്ഷിച്ചുവരികയാണ്. നിലവിലെ സാഹചര്യത്തിൽ പരിഭ്രാന്തരാകേണ്ടതില്ലെന്നും സാധാരണ ജാഗ്രത തുടരണമെന്നും ICMR ജനങ്ങളോട് ആവശ്യപ്പെട്ടു.