‘എന്നേക്കാൾ അർഹതയുള്ളവർ ആരുമില്ല

നൊബേൽ സമാധാന പുരസ്കാരത്തിന് തനിക്ക് അർഹതയുണ്ടെന്ന അവകാശവാദവുമായി യുഎസ് പ്രസിഡന്റ് ഡൊണാൾഡ് ട്രംപ് വീണ്ടും രംഗത്ത്. എട്ട് യുദ്ധങ്ങൾ അവസാനിപ്പിക്കുന്നതിൽ താൻ പങ്കുവഹിച്ചെന്നും മറ്റാരും ചെയ്യാത്ത കാര്യങ്ങളാണ് തന്റെ ഭരണകൂടം ചെയ്തതെന്നും ട്രംപ് പറഞ്ഞു. ഒക്ടോബർ ഒമ്പതിന് 2026ലെ നൊബേൽ സമാധാന പുരസ്കാരം പ്രഖ്യാപിക്കാനിരിക്കെയാണ് അദ്ദേഹത്തിന്റെ പുതിയ അവകാശവാദം.

തന്റെ സമാധാന ശ്രമങ്ങൾ ഇനിയും തുടരുകയാണെന്നും മറ്റൊരു സംഘർഷം കൂടി അവസാനിപ്പിക്കാനുള്ള ശ്രമത്തിലാണെന്നും ട്രംപ് പറഞ്ഞു. ഇറാനുമായുള്ള നിലവിലെ സംഘർഷത്തെക്കുറിച്ചുള്ള സൂചനയായാണ് ഈ പരാമർശം വിലയിരുത്തപ്പെടുന്നത്. അതേസമയം, ട്രംപ് അവസാനിപ്പിച്ചതായി അവകാശപ്പെടുന്ന ചില സംഘർഷങ്ങളിൽ വീണ്ടും അക്രമം ഉണ്ടായിട്ടുണ്ടെന്നും അദ്ദേഹത്തിന്റെ പങ്കിനെക്കുറിച്ച് ബന്ധപ്പെട്ട ചില കക്ഷികൾ വ്യത്യസ്ത നിലപാടുകൾ സ്വീകരിച്ചിട്ടുണ്ടെന്നും റിപ്പോർട്ടുകളുണ്ട്.

കംബോഡിയ, ഇസ്രയേൽ, പാകിസ്താൻ എന്നീ രാജ്യങ്ങളിലെ നേതാക്കൾ ട്രംപിനെ നൊബേൽ പുരസ്കാരത്തിനായി നാമനിർദേശം ചെയ്തതായി നേരത്തെ അവകാശപ്പെട്ടിരുന്നു. എന്നാൽ നാമനിർദേശങ്ങൾ രഹസ്യമായി സൂക്ഷിക്കുന്നതിനാൽ അവ ഔദ്യോഗികമായി സ്ഥിരീകരിക്കപ്പെട്ടിട്ടില്ല. 2026ലെ പുരസ്കാരത്തിനായി ആകെ 287 പേരും സംഘടനകളും പരിഗണിക്കപ്പെടുന്നുണ്ടെന്നാണ് നൊബേൽ കമ്മിറ്റി നേരത്തെ അറിയിച്ചത്.

ഇതിനിടെ ഇറാനെതിരായ പുതിയ സൈനിക നടപടിയുടെ സാധ്യതയും യുഎസ് ഭരണകൂടം പരിഗണിക്കുന്നതായി റിപ്പോർട്ടുകളുണ്ട്. ഇറാനിൽ വീണ്ടും വലിയ സൈനിക നടപടി സ്വീകരിക്കാനുള്ള തയ്യാറെടുപ്പുകൾ പൂർത്തിയാക്കാൻ യുഎസ് സെൻട്രൽ കമാൻഡിന് നിർദേശം നൽകിയിട്ടുണ്ടെങ്കിലും ആക്രമണം നടത്താനുള്ള അന്തിമ തീരുമാനം ട്രംപ് എടുത്തിട്ടില്ലെന്നാണ് റിപ്പോർട്ട്. ഈ സാഹചര്യത്തിലാണ് സമാധാന പുരസ്കാരത്തിനായുള്ള ട്രംപിന്റെ പുതിയ അവകാശവാദം ശ്രദ്ധ നേടുന്നത്.