സമ്പദ്വ്യവസ്ഥയ്ക്ക് കരുത്തേകാൻ അമേരിക്കയോട് 10 ബില്യൺ ഡോളർ സഹായം തേടി പാകിസ്ഥാൻ
വിദേശനാണയ ശേഖരം ശക്തിപ്പെടുത്തുകയും സമ്പദ്വ്യവസ്ഥയ്ക്ക് സ്ഥിരത ഉറപ്പാക്കുകയും ചെയ്യുന്നതിനായി അമേരിക്കയോട് 10 ബില്യൺ ഡോളറിന്റെ എക്സ്ചേഞ്ച് സ്റ്റാബിലൈസേഷൻ സഹായ പദ്ധതി അനുവദിക്കണമെന്ന് പാകിസ്ഥാൻ അഭ്യർഥിച്ചതായി റിപ്പോർട്ട്. പാകിസ്ഥാൻ ധനമന്ത്രി മുഹമ്മദ് ഔറംഗസേബ് അമേരിക്കൻ ട്രഷറി അധികൃതരുമായി നടത്തിയ ചർച്ചയിലാണ് ഈ ആവശ്യം മുന്നോട്ടുവെച്ചതെന്നാണ് വിവരം.
അഞ്ച് വർഷം വരെ കാലാവധിയുള്ള ഈ സഹായ പദ്ധതി വിദേശനാണയ ശേഖരം വർധിപ്പിക്കാനും രൂപയുടെ മൂല്യം സ്ഥിരപ്പെടുത്താനും ഐഎംഎഫിനെ ആശ്രയിക്കുന്നത് കുറയ്ക്കാനുമാണ് ലക്ഷ്യമിടുന്നത്. മധ്യപൂർവ സംഘർഷങ്ങളുടെയും ആഗോള സാമ്പത്തിക അനിശ്ചിതത്വത്തിന്റെയും പശ്ചാത്തലത്തിലാണ് പാകിസ്ഥാന്റെ ഈ നീക്കം.
അതേസമയം, അമേരിക്ക ഇതുവരെ ഈ ആവശ്യത്തിൽ ഔദ്യോഗിക പ്രതികരണം അറിയിച്ചിട്ടില്ല. സാമ്പത്തിക പരിഷ്കാരങ്ങളും വിദേശ നിക്ഷേപ ആകർഷണവും ലക്ഷ്യമിട്ട് പാകിസ്ഥാൻ വിവിധ രാജ്യങ്ങളുമായും സ്ഥാപനങ്ങളുമായും സഹകരണം ശക്തിപ്പെടുത്തുന്ന സാഹചര്യത്തിലാണ് പുതിയ സഹായ അഭ്യർഥന.
