പോളണ്ടിൽ കോടതി പ്രതിസന്ധി രൂക്ഷം; പ്രതിഷേധക്കാരും പൊലീസും ഏറ്റുമുട്ടി, സെനഗൽ സന്ദർശനം വെട്ടിച്ചുരുക്കി പ്രസിഡന്റ്
വാർസോ: പോളണ്ടിൽ ഭരണഘടനാ കോടതിയുടെ അധികാരത്തെയും നേതൃത്വത്തെയും ചൊല്ലിയുള്ള തർക്കം രൂക്ഷമായതോടെ രാജ്യത്ത് പ്രതിഷേധം ശക്തമായി. കോടതിയുടെ പ്രസിഡന്റിനെ സസ്‌പെൻഡ് ചെയ്തതിനെത്തുടർന്ന് വെള്ളിയാഴ്ച നൂറുകണക്കിന് ആളുകൾ കോടതിക്ക് മുന്നിൽ പ്രതിഷേധവുമായി എത്തി. പ്രതിഷേധക്കാർ കോടതിയുടെ വേലി മറികടക്കുകയും പൊലീസിനു നേരെ വസ്തുക്കൾ എറിയുകയും ചെയ്തതോടെ സംഘർഷാവസ്ഥയുണ്ടായി. സംഭവത്തിൽ മൂന്ന് പേരെ പൊലീസ് കസ്റ്റഡിയിലെടുത്തു.
ഭരണഘടനാ കോടതി പ്രസിഡന്റ് ബൊഗ്ദാൻ സ്വിയൻച്കോവ്സ്കിയെ ഒരു മാസത്തേക്ക് ചുമതലയിൽനിന്ന് മാറ്റിയതാണ് പുതിയ പ്രതിസന്ധിക്ക് കാരണം. മുതിർന്ന ജഡ്ജിയായ അന്ന കോർവിൻ-പിയോട്രോവ്സ്കിയാണ് നടപടി പ്രഖ്യാപിച്ചത്. പാർലമെന്റിലെ നിലവിലെ ഭൂരിപക്ഷം തിരഞ്ഞെടുത്ത ജഡ്ജിമാർക്ക് കോടതി നടപടികളിൽ പങ്കെടുക്കാൻ തടസ്സം സൃഷ്ടിച്ചെന്ന ആരോപണവും ഇതിനു പിന്നിലുണ്ട്. എന്നാൽ നടപടി നിയമവിരുദ്ധമാണെന്നാണ് പ്രതിപക്ഷത്തിന്റെ വാദം.
സംഭവവികാസങ്ങൾക്കിടെ സെനഗലിലേക്ക് ഔദ്യോഗിക സന്ദർശനത്തിനായി യാത്ര തിരിച്ച പ്രസിഡന്റ് കരോൾ നവ്‌റോക്കിയെ യാത്ര പാതിവഴിയിൽ അവസാനിപ്പിച്ച് പോളണ്ടിലേക്ക് മടങ്ങി. രാജ്യത്ത് ഇത്തരമൊരു സാഹചര്യം നിലനിൽക്കുമ്പോൾ പ്രസിഡന്റ് പോളണ്ടിൽ ഉണ്ടായിരിക്കണമെന്നായിരുന്നു അദ്ദേഹത്തിന്റെ പ്രതികരണം.
പ്രധാനമന്ത്രി ഡൊണാൾഡ് ടസ്കിന്റെ യൂറോപ്യൻ അനുകൂല സർക്കാരും മുൻ ഭരണകക്ഷിയായ ലാ ആൻഡ് ജസ്റ്റിസ് പാർട്ടിയുടെ പിന്തുണയുള്ള പ്രസിഡന്റും തമ്മിലുള്ള ദീർഘകാല തർക്കത്തിന്റെ ഭാഗമാണ് നിലവിലെ പ്രതിസന്ധി. ജുഡീഷ്യറിയുടെ സ്വാതന്ത്ര്യം പുനഃസ്ഥാപിക്കാനാണ് സർക്കാർ ശ്രമിക്കുന്നതെന്ന് ടസ്ക് വ്യക്തമാക്കി. എന്നാൽ സർക്കാരിന്റെ നടപടി ഭരണഘടനാ ക്രമത്തിനെതിരായ നീക്കമാണെന്നാണ് പ്രതിപക്ഷത്തിന്റെ ആരോപണം. കോടതിയുടെ അധികാരവും നിയമസാധുതയും സംബന്ധിച്ച തർക്കം രാജ്യത്തെ രാഷ്ട്രീയ അനിശ്ചിതത്വം കൂടുതൽ ശക്തമാക്കിയിരിക്കുകയാണ്.
