10,000 അടി ആഴത്തിൽ അപൂർവ ‘ബിഗ്ഫിൻ’ കണവ; കാലിഫോർണിയ തീരത്ത് ശാസ്ത്രജ്ഞർക്ക് അത്ഭുതക്കാഴ്ച

കാലിഫോർണിയ തീരത്ത് സമുദ്രനിരപ്പിൽ നിന്ന് 10,751 അടി അഥവാ ഏകദേശം 3,277 മീറ്റർ ആഴത്തിൽ അപൂർവമായ ബിഗ്ഫിൻ കണവയെ ശാസ്ത്രജ്ഞർ ജീവനോടെ കണ്ടെത്തി. വടക്കുകിഴക്കൻ പസഫിക് സമുദ്രത്തിൽ ഈ ജീവിയെ ജീവനോടെ രേഖപ്പെടുത്തുന്ന ആദ്യ സ്ഥിരീകരിച്ച നിരീക്ഷണമാണിത്. 

‘മാഗ്നാപിന്ന’ എന്ന ശാസ്ത്രീയ ജനുസിൽപ്പെടുന്ന ബിഗ്ഫിൻ കണവയ്ക്ക് ശരീരത്തേക്കാൾ പലമടങ്ങ് നീളമുള്ള കൈകളും ടെന്റക്കിളുകളുമാണ് പ്രത്യേകത. കണ്ടെത്തിയ കണവയ്ക്ക് ആകെ ഏകദേശം 1.25 മീറ്റർ നീളമുണ്ടായിരുന്നു. ഇരുണ്ട ആഴക്കടലിൽ ഏറെ അപൂർവമായി മാത്രം കാണപ്പെടുന്ന ജീവിയാണിത്. 

ഓഗസ്റ്റ് ഏഴിനാണ് ഗവേഷകർ ഈ അപൂർവ ദൃശ്യം പകർത്തിയത്. മോണ്ടെറി ബേ അക്വേറിയം റിസർച്ച് ഇൻസ്റ്റിറ്റ്യൂട്ടും യുഎസ് ദേശീയ സമുദ്ര-അന്തരീക്ഷ ഭരണകൂടവും ചേർന്നുള്ള ഗവേഷണത്തിനിടെ ‘ഡോക് റിക്കറ്റ്സ്’ എന്ന ആളില്ലാ ആഴക്കടൽ ഗവേഷണ വാഹനത്തിന്റെ ക്യാമറയിലാണ് കണവ പതിഞ്ഞത്. 

കടൽത്തട്ടിന് മുകളിൽ ഒഴുകിനിന്ന കണവ കൈകളും ടെന്റക്കിളുകളും ഏകദേശം 90 ഡിഗ്രിയിൽ വളച്ച നിലയിലായിരുന്നു. ഗവേഷകർ ഇതിനെ ‘എൽബോ പോസ്’ എന്നാണ് വിശേഷിപ്പിച്ചത്. ഈ പ്രത്യേക ശരീരനില ഇരയെ പിടികൂടാനുള്ള ഭക്ഷണരീതിയുടെ ഭാഗമായിരിക്കാമെന്നാണ് ഗവേഷകരുടെ നിഗമനം. 

ബിഗ്ഫിൻ കണവയെക്കുറിച്ച് ഇപ്പോഴും വളരെ കുറച്ച് വിവരങ്ങളേ ശാസ്ത്രലോകത്തിന് ലഭ്യമായിട്ടുള്ളൂ. ഇവയുടെ ഭക്ഷണരീതി, പെരുമാറ്റം, പ്രജനനം തുടങ്ങിയ കാര്യങ്ങളിൽ നിരവധി ചോദ്യങ്ങൾ ബാക്കിയാണ്. ലോകമെമ്പാടുമായി വളരെ കുറച്ച് നിരീക്ഷണങ്ങൾ മാത്രമാണ് ഇതുവരെ രേഖപ്പെടുത്തിയിട്ടുള്ളത്. 

അപൂർവമായ ഈ കണ്ടെത്തൽ ആഴക്കടലിലെ ജീവവൈവിധ്യത്തെക്കുറിച്ചുള്ള പഠനങ്ങൾക്ക് പുതിയ വഴിതുറക്കുമെന്നാണ് ശാസ്ത്രജ്ഞരുടെ പ്രതീക്ഷ. മനുഷ്യർക്ക് ഇന്നും വലിയൊരു അജ്ഞാതലോകമായി തുടരുന്ന സമുദ്രത്തിന്റെ ആഴങ്ങളിൽ ഇനിയും നിരവധി വിസ്മയങ്ങൾ കണ്ടെത്താനുണ്ടെന്നതിന്റെ മറ്റൊരു തെളിവുകൂടിയാണ് ഈ കണവയുടെ ദൃശ്യങ്ങൾ.