മത്സരത്തിനിടെ കഞ്ചാവിന്റെ ഗന്ധം; യു.എസ്. ഓപ്പണിൽ പരാതി ഉന്നയിച്ച് സബലെങ്ക

ന്യൂയോർക്ക്: യു.എസ്. ഓപ്പൺ ടെന്നിസ് മത്സരത്തിനിടെ ശക്തമായ കഞ്ചാവിന്റെ ഗന്ധം അനുഭവപ്പെട്ടതിനെ തുടർന്ന് ലോക ഒന്നാം നമ്പർ താരം ആര്യാന സബലെങ്ക അമ്പയറോട് പരാതി ഉന്നയിച്ചു. കമില്ല റഖിമോവയ്ക്കെതിരായ മൂന്നാം റൗണ്ട് മത്സരത്തിനിടെയായിരുന്നു സംഭവം. 

ലൂയിസ് ആംസ്‌ട്രോങ് സ്റ്റേഡിയത്തിൽ ആദ്യ സെറ്റിൽ സബലെങ്ക 2-0ന് മുന്നിലായിരിക്കെയാണ് ഗന്ധം ശ്രദ്ധയിൽപ്പെട്ടത്. സർവ് ചെയ്യുന്നതിനിടെ പന്ത് രണ്ടുതവണ താഴേക്ക് വീഴ്ത്തിയ ശേഷം താരം അമ്പയറുടെ അടുത്തെത്തി വിഷയം അറിയിച്ചു.

ഗന്ധം കാണികളിൽ നിന്നാണോ അതോ സമീപത്തെ പാർക്കിൽനിന്ന് കാറ്റിനൊപ്പം എത്തിയതാണോ എന്ന് വ്യക്തമല്ലെന്ന് സബലെങ്ക പിന്നീട് പറഞ്ഞു. മത്സരത്തിൽ ശ്രദ്ധ കേന്ദ്രീകരിക്കാൻ ഇത് ബുദ്ധിമുട്ടുണ്ടാക്കിയെന്നും താരം വ്യക്തമാക്കി. 

യു.എസ്. ഓപ്പൺ വേദി പുകവലി നിരോധിത മേഖലയാണെന്ന് സംഘാടകർ വ്യക്തമാക്കി. സംഭവത്തെ തുടർന്ന് അധികൃതർ പരിശോധന നടത്തിയെങ്കിലും വേദിക്കുള്ളിൽ പുകവലിച്ച ആരെയും കണ്ടെത്തി പുറത്താക്കിയില്ല. 

അതേസമയം, മത്സരത്തിൽ സബലെങ്ക മികച്ച പ്രകടനം തുടർന്നു. റഖിമോവയെ 6-3, 6-4ന് തോൽപ്പിച്ച് താരം നാലാം റൗണ്ടിലെത്തി. തുടർച്ചയായ 16-ാം യു.എസ്. ഓപ്പൺ വിജയവും ഇതോടെ സബലെങ്ക സ്വന്തമാക്കി.