ദക്ഷിണ കൊറിയയിലെ മാർഷൽ ലോ കേസ്: യൂണിന്റെ മറ്റൊരു അടുത്ത അനുയായിക്കും 25 വർഷം തടവ്

സിയോൾ: മുൻ പ്രസിഡന്റ് യൂൺ സുക് യോൾ പ്രഖ്യാപിച്ച വിവാദ മാർഷൽ ലോ നടപടിയുമായി ബന്ധപ്പെട്ട കേസിൽ മുൻ നീതിന്യായ മന്ത്രി പാർക്ക് സങ്-ജേയ്ക്ക് ദക്ഷിണ കൊറിയയിലെ കോടതി 25 വർഷം തടവുശിക്ഷ വിധിച്ചു. 2024 ഡിസംബറിലെ ഭരണഘടനാ പ്രതിസന്ധിയുമായി ബന്ധപ്പെട്ട് ശിക്ഷിക്കപ്പെടുന്ന യൂണിന്റെ ഏറ്റവും മുതിർന്ന സഹപ്രവർത്തകരിൽ ഒരാളാണ് പാർക്ക്. 

മാർഷൽ ലോ പ്രഖ്യാപനം നടപ്പാക്കുന്നതിൽ സജീവ പങ്കുവഹിക്കുകയും ഭരണഘടനാ സംവിധാനത്തെ അട്ടിമറിക്കാനുള്ള ശ്രമത്തിൽ പങ്കാളിയാകുകയും ചെയ്തുവെന്നാണ് കോടതിയുടെ കണ്ടെത്തൽ. വിചാരണക്കിടെ എല്ലാ ആരോപണങ്ങളും പാർക്ക് നിഷേധിച്ചിരുന്നെങ്കിലും പ്രോസിക്യൂഷൻ സമർപ്പിച്ച തെളിവുകൾ കോടതി അംഗീകരിക്കുകയായിരുന്നു. 

2024 ഡിസംബർ 3-ന് അന്നത്തെ പ്രസിഡന്റ് യൂൺ സുക് യോൾ രാജ്യത്ത് അടിയന്തര മാർഷൽ ലോ പ്രഖ്യാപിച്ചെങ്കിലും പാർലമെന്റ് മണിക്കൂറുകൾക്കകം അത് റദ്ദാക്കി. ഈ സംഭവം രാജ്യത്തെ കടുത്ത രാഷ്ട്രീയ പ്രതിസന്ധിയിലേക്ക് നയിക്കുകയും തുടർന്ന് യൂണിനെ ഇംപീച്ച് ചെയ്യുകയും അധികാരത്തിൽ നിന്ന് പുറത്താക്കുകയും ചെയ്തു. പിന്നീട് കലാപത്തിന് നേതൃത്വം നൽകിയെന്ന കുറ്റത്തിൽ യൂണിന് ജീവപര്യന്തം തടവും കോടതി വിധിച്ചു. 

മാർഷൽ ലോ ഗൂഢാലോചനയുമായി ബന്ധപ്പെട്ട് മുൻ പ്രധാനമന്ത്രി, മുൻ ആഭ്യന്തര മന്ത്രി ഉൾപ്പെടെ യൂൺ ഭരണകൂടത്തിലെ നിരവധി മുതിർന്ന ഉദ്യോഗസ്ഥർക്കെതിരെയും വിവിധ കേസുകളിൽ ശിക്ഷ വിധിച്ചിട്ടുണ്ടെന്ന് റിപ്പോർട്ടുകൾ വ്യക്തമാക്കുന്നു. പാർക്കിന്റെ ശിക്ഷയോടെ ഈ കേസിലെ നിയമനടപടികൾ കൂടുതൽ ശക്തമായ ഘട്ടത്തിലേക്ക് കടന്നിരിക്കുകയാണ്.