കഴിഞ്ഞ രണ്ട് വർഷത്തിനിടെയുണ്ടായ തിക്കിലും തിരക്കിലും മരണങ്ങൾ: പ്രധാന സംഭവങ്ങൾ

2025 സെപ്റ്റംബർ 27: കരൂരിൽ തമിഴഗ വെട്രി കഴകം പ്രസിഡന്റ് നടൻ വിജയ് പങ്കെടുത്ത റാലിയിൽ തിക്കിലും തിരക്കിലും 40 പേർ മരിച്ചു.

2025 ജൂൺ 4: 18 വർഷത്തിനിടെ ഇന്ത്യൻ പ്രീമിയർ ലീഗിൽ ആദ്യമായി കിരീടം നേടിയ റോയൽ ചലഞ്ചേഴ്‌സ് ബാംഗ്ലൂരിന്റെ വിജയാഘോഷത്തിനിടെ ബെംഗളൂരുവിലെ ചിന്നസ്വാമി സ്റ്റേഡിയത്തിൽ ഉണ്ടായ ദുരന്തത്തിൽ 11 പേർ മരിച്ചു.

2025 മെയ് 3: 'ലൈരായ് ജാത്ര' ഉത്സവത്തിനായി ലക്ഷക്കണക്കിന് ഭക്തർ ഒത്തുകൂടിയ ഗോവയിലെ ഷിർഗാവോ ഗ്രാമത്തിലെ ശ്രീ ലൈരായ് ദേവി ക്ഷേത്രത്തിൽ ഉണ്ടായ തിക്കിലും തിരക്കിലും ഏഴ് പേർ മരിക്കുകയും 80 ലധികം പേർക്ക് പരിക്കേൽക്കുകയും ചെയ്തു.

2025 ഫെബ്രുവരി 15: ന്യൂഡൽഹി റെയിൽവേ സ്റ്റേഷനിൽ തിക്കിലും തിരക്കിലും 18 പേർ മരിച്ചു. മഹാ കുംഭമേളയിൽ പങ്കെടുക്കാൻ പോകുകയായിരുന്നു അവരിൽ ഭൂരിഭാഗവും.

2025 ജനുവരി 29: ഉത്തർപ്രദേശിലെ പ്രയാഗ്‌രാജിൽ നടന്ന മഹാ കുംഭമേളയ്ക്കിടെയുണ്ടായ തിക്കിലും തിരക്കിലും 30 പേർ മരിച്ചു. 60 ലധികം പേർക്ക് പരിക്കേറ്റു. മൗനി അമാവാസിയുടെ പുണ്യദിനത്തിൽ രാവിലെ ആളുകൾ കുളിക്കാൻ എത്തിയപ്പോഴാണ് അപകടം സംഭവിച്ചത്.

2025 ജനുവരി 8: തിരുമലയിലെ ഭഗവാൻ വെങ്കിടേശ്വര സ്വാമി ക്ഷേത്രത്തിൽ ശുഭകരമായ വൈകുണ്ഠ ദ്വാര ദർശന ചടങ്ങിനുള്ള സൗജന്യ ടോക്കണുകൾ വിതരണം ചെയ്യുന്നതിനിടെയുണ്ടായ തിക്കിലും തിരക്കിലും പെട്ട് ആറ് പേർ മരിച്ചു.

2024 ഡിസംബർ 4: ഹൈദരാബാദിലെ സന്ധ്യാ തിയേറ്ററിൽ അല്ലു അർജുന്റെ പുഷ്പ-2 സിനിമയുടെ പ്രദർശനത്തിനിടെയുണ്ടായ തിക്കിലും തിരക്കിലും പെട്ട് ഒരു സ്ത്രീയും ഒരു കുട്ടിയും മരിച്ചു.

2024 ഓഗസ്റ്റ് 12: ബീഹാറിലെ ബനാവറിലെ ബാബ സിദ്ധനാഥ ക്ഷേത്രത്തിൽ നടന്ന തിക്കിലും തിരക്കിലും പെട്ട് ഏഴ് പേർ മരിച്ചു. 10 പേർക്ക് പരിക്കേറ്റു. ശ്രാവണ മാസത്തിലെ നാലാമത്തെ തിങ്കളാഴ്ച പൂജയിൽ പങ്കെടുക്കാൻ എത്തിയ വലിയൊരു ജനക്കൂട്ടമാണ് തിക്കിലും തിരക്കിലും പെട്ടത്.

2024 ജൂലൈ 2: ഉത്തർപ്രദേശിലെ ഹാത്രാസിൽ ആൾദൈവം ബോലെ ബാബയുടെ മതപരമായ സമ്മേളനത്തിനിടെ (സത്സംഗം) തിക്കിലും തിരക്കിലും പെട്ട് 121 പേർ മരിച്ചു.