മെസിയില്ലാതെ തുടക്കം; ജോർദാനെതിരെ മാറ്റങ്ങളുമായി അർജന്റീന, പകരക്കാരനായി സൂപ്പർതാരം ഇറങ്ങും

ഡാലസ്: 2026 ഫിഫ ലോകകപ്പിലെ ഗ്രൂപ്പ് ജെയിലെ അവസാന മത്സരത്തിൽ ജോർദാനെതിരെ അർജന്റീന ക്യാപ്റ്റൻ ലയണൽ മെസി ആദ്യ ഇലവനിൽ ഉണ്ടാകില്ല. പരിശീലകൻ ലയണൽ സ്കലോണി മെസിക്ക് വിശ്രമം അനുവദിച്ചിരിക്കുകയാണ്. രണ്ടാം പകുതിയിൽ പകരക്കാരനായി മെസി കളത്തിലിറങ്ങുമെന്ന് അദ്ദേഹം സ്ഥിരീകരിച്ചു. 

അൾജീരിയക്കും ഓസ്ട്രിയയ്ക്കുമെതിരായ ആദ്യ രണ്ട് മത്സരങ്ങളും ജയിച്ച് അർജന്റീന നേരത്തേ തന്നെ ഗ്രൂപ്പിൽ ഒന്നാം സ്ഥാനവും പ്രീക്വാർട്ടർ പ്രവേശനവും ഉറപ്പിച്ചിരുന്നു. അതിനാൽ പ്രധാന താരങ്ങൾക്ക് വിശ്രമം നൽകുകയും സ്ക്വാഡിലെ മറ്റ് താരങ്ങൾക്ക് അവസരം നൽകുകയും ചെയ്യാനാണ് പരിശീലകന്റെ തീരുമാനം. 

ഈ ലോകകപ്പിൽ അർജന്റീനയുടെ അഞ്ച് ഗോളുകളും മെസിയുടെ പേരിലാണ്. മികച്ച ഫോമിലുള്ള താരത്തെ നോക്കൗട്ട് മത്സരങ്ങൾ മുന്നിൽക്കണ്ട് സംരക്ഷിക്കാനാണ് ഈ നീക്കം. മെസി കളത്തിൽ എത്തുന്ന സമയത്തെക്കുറിച്ച് സ്കലോണി വ്യക്തത നൽകിയിട്ടില്ലെങ്കിലും മത്സരത്തിനിടെ അദ്ദേഹം ഇറങ്ങുമെന്ന് വ്യക്തമാക്കിയിട്ടുണ്ട്. 

ലോകകപ്പിൽ ആദ്യമായി കളിക്കുന്ന ജോർദാൻ ആദ്യ രണ്ട് മത്സരങ്ങളും തോറ്റ് നേരത്തേ തന്നെ പുറത്തായതിനാൽ ഈ മത്സരത്തിന്റെ ഫലം അർജന്റീനയുടെ യോഗ്യതയെ ബാധിക്കില്ല. എന്നാൽ ടീമിലെ യുവതാരങ്ങൾക്ക് തങ്ങളുടെ കഴിവ് തെളിയിക്കാൻ ഇത് മികച്ച അവസരമായിരിക്കുമെന്ന് പരിശീലകൻ വിലയിരുത്തി.