ഇന്തോനേഷ്യയിൽ ശക്തമായ ഭൂചലനം; 7.7 തീവ്രത, സുനാമി മുന്നറിയിപ്പ്

ജക്കാർത്ത: ഇന്തോനേഷ്യയിലെ ഫ്ലോറസ് ദ്വീപിന് സമീപം ശക്തമായ ഭൂചലനം. റിക്ടർ സ്കെയിലിൽ 7.7 തീവ്രത രേഖപ്പെടുത്തിയ ഭൂചലനത്തിൽ രണ്ട് പേർ മരിച്ചു. നിരവധി കെട്ടിടങ്ങൾ തകർന്നതായും നാശനഷ്ടങ്ങൾ റിപ്പോർട്ട് ചെയ്തതായും അധികൃതർ അറിയിച്ചു. ഭൂചലനത്തെ തുടർന്ന് സുനാമി മുന്നറിയിപ്പും പുറപ്പെടുവിച്ചു.

ശനിയാഴ്ച പുലർച്ചെയാണ് ഫ്ലോറസ് ദ്വീപിന് സമീപം ഭൂചലനം അനുഭവപ്പെട്ടത്. യുഎസ് ജിയോളജിക്കൽ സർവേയുടെ കണക്കനുസരിച്ച് 10 കിലോമീറ്റർ ആഴത്തിലായിരുന്നു ഭൂചലനത്തിന്റെ പ്രഭവകേന്ദ്രം. എൻഡെ നഗരത്തിന് വടക്ക്-പടിഞ്ഞാറായി ഏകദേശം 68 കിലോമീറ്റർ അകലെയായിരുന്നു ഇത്. പിന്നാലെ 5.9, 5.6, 6.1 തീവ്രതയുള്ള ശക്തമായ തുടർചലനങ്ങളും ഉണ്ടായി.

ഭൂചലനത്തിൽ മൗമേരെ തുറമുഖത്ത് ഒരു പുരുഷനും ഒരു സ്ത്രീയും മരിച്ചതായി ഇന്തോനേഷ്യൻ ദുരന്തനിവാരണ ഏജൻസി അറിയിച്ചു. ഒരാൾക്ക് പരിക്കേറ്റതായും റിപ്പോർട്ടുണ്ട്. മൗമേരെ ഉൾപ്പെടെയുള്ള പ്രദേശങ്ങളിൽ വീടുകൾക്കും മറ്റ് കെട്ടിടങ്ങൾക്കും കേടുപാടുകൾ സംഭവിച്ചു. ആശുപത്രികളിൽ നിന്ന് രോഗികളെ സുരക്ഷിത സ്ഥാനങ്ങളിലേക്ക് മാറ്റുകയും ചെയ്തു.

ഭൂചലനത്തിന് പിന്നാലെ കിഴക്കൻ നുസ തെംഗാര, ദക്ഷിണ സുലവേസി, പടിഞ്ഞാറൻ നുസ തെംഗാര തുടങ്ങിയ പ്രദേശങ്ങളിലെ തീരങ്ങളിൽ സുനാമി മുന്നറിയിപ്പ് നൽകിയിരുന്നു. തീരപ്രദേശങ്ങളിൽ നിന്നും നദീതീരങ്ങളിൽ നിന്നും മാറി ഉയർന്ന പ്രദേശങ്ങളിലേക്ക് പോകാൻ അധികൃതർ ജനങ്ങൾക്ക് നിർദേശം നൽകി.

പിന്നീട് കാര്യമായ കടൽനിരപ്പിലെ മാറ്റങ്ങൾ രേഖപ്പെടുത്തിയിട്ടില്ലെന്ന് സ്ഥിരീകരിച്ചതിനെ തുടർന്ന് സുനാമി മുന്നറിയിപ്പ് പിൻവലിച്ചു. എന്നാൽ തുടർചലനങ്ങളുടെ സാധ്യത കണക്കിലെടുത്ത് അധികൃതർ സ്ഥിതിഗതികൾ നിരീക്ഷിച്ചുവരികയാണ്.

പസഫിക് ‘റിംഗ് ഓഫ് ഫയർ’ മേഖലയിലാണ് ഇന്തോനേഷ്യ സ്ഥിതി ചെയ്യുന്നത്. അതിനാൽ ഭൂകമ്പങ്ങളും അഗ്നിപർവത പ്രവർത്തനങ്ങളും ഇവിടെ പതിവാണ്. 1992-ൽ ഫ്ലോറസ് മേഖലയിലുണ്ടായ ശക്തമായ ഭൂചലനത്തെ തുടർന്ന് സുനാമിയുണ്ടാകുകയും ഏകദേശം 2,500 പേർ മരിക്കുകയും ചെയ്തിരുന്നു.