ടെലഗ്രാം ജൂൺ 22 വരെ ഇന്ത്യയിൽ താൽക്കാലികമായി നിരോധിച്ചു

ന്യൂഡൽഹി: ജൂൺ 21-ന് നടക്കുന്ന NEET-UG 2026 റീ-പരീക്ഷയുടെ പശ്ചാത്തലത്തിൽ, രാജ്യത്ത് ടെലഗ്രാം മെസേജിംഗ് പ്ലാറ്റ്ഫോം ജൂൺ 22 വരെ താൽക്കാലികമായി നിരോധിച്ചു. പരീക്ഷയുമായി ബന്ധപ്പെട്ട ചോദ്യപേപ്പർ ചോർച്ച, തട്ടിപ്പ്, സംഘടിത കോപ്പിയടി ശൃംഖലകൾ എന്നിവ തടയുക എന്ന ലക്ഷ്യത്തോടെയാണ് നടപടി സ്വീകരിച്ചതെന്നാണ് റിപ്പോർട്ടുകൾ. 

റിപ്പോർട്ടുകൾ പ്രകാരം, നാഷണൽ ടെസ്റ്റിംഗ് ഏജൻസിയുടെ (NTA) ശുപാർശയെ തുടർന്നാണ് കേന്ദ്ര സർക്കാർ നടപടി സ്വീകരിച്ചത്. പരീക്ഷാ തട്ടിപ്പുമായി ബന്ധപ്പെട്ട ചില സംഘങ്ങൾ ടെലഗ്രാം പ്ലാറ്റ്ഫോം ദുരുപയോഗം ചെയ്യുന്നുവെന്ന വിലയിരുത്തലിനെ തുടർന്നാണ് ഈ നീക്കം. 

അതേസമയം, റീ-പരീക്ഷയ്ക്ക് മുന്നോടിയായി സോഷ്യൽ മീഡിയയിൽ വ്യാപകമായി പ്രചരിച്ച 'NEET ചോദ്യപേപ്പർ ചോർന്നു' എന്ന അവകാശവാദങ്ങൾ വ്യാജമാണെന്ന് NTA വ്യക്തമാക്കിയിട്ടുണ്ട്. പരീക്ഷാർത്ഥികൾ അഭ്യൂഹങ്ങൾ വിശ്വസിക്കാതെ ഔദ്യോഗിക അറിയിപ്പുകൾ മാത്രം പിന്തുടരണമെന്ന് അധികൃതർ നിർദേശിച്ചു. 

റീ-NEET പരീക്ഷയുടെ സുരക്ഷ ശക്തമാക്കുന്നതിനായി ചോദ്യപേപ്പർ തയ്യാറാക്കുന്ന വിദഗ്ധരെയും വിവർത്തകരെയും സുരക്ഷിത കേന്ദ്രങ്ങളിൽ പ്രത്യേക നിരീക്ഷണത്തിൽ പാർപ്പിച്ചിട്ടുണ്ടെന്നും റിപ്പോർട്ടുകളുണ്ട്. കഴിഞ്ഞ പരീക്ഷയുമായി ബന്ധപ്പെട്ട വിവാദങ്ങൾക്ക് പിന്നാലെ പരീക്ഷാ സംവിധാനത്തിൽ വിശ്വാസം പുനഃസ്ഥാപിക്കാനുള്ള ശ്രമങ്ങളുടെ ഭാഗമായാണ് ഈ നടപടികളും സ്വീകരിച്ചിരിക്കുന്നത്.