കപ്പൽ മുങ്ങുന്നു, രക്ഷിക്കൂ; എണ്ണക്കപ്പലിൽ നിന്ന് ഇന്ത്യൻ ജീവനക്കാരുടെ അടിയന്തര സന്ദേശം പുറത്ത്

മസ്‌കത്ത്: ഒമാൻ തീരത്തിന് സമീപം ആക്രമണത്തിനിരയായ എണ്ണക്കപ്പൽ എം.ടി. മാരിവെക്സ്-ലുണ്ടായിരുന്ന ഇന്ത്യൻ നാവികരുടെ അടിയന്തര സഹായ അഭ്യർഥന സന്ദേശം പുറത്തുവന്നു. കപ്പലിൽ തീപിടിത്തമുണ്ടായതായും അടിഭാഗത്ത് വലിയ ദ്വാരം രൂപപ്പെട്ടതിനെ തുടർന്ന് വെള്ളം കയറുകയാണെന്നും കപ്പൽ മുങ്ങാനുള്ള സാഹചര്യമാണെന്നും സന്ദേശത്തിൽ വ്യക്തമാക്കിയിരുന്നു. “കപ്പൽ മുങ്ങുകയാണ്, ദയവായി രക്ഷിക്കൂ” എന്നായിരുന്നു ജീവനക്കാരുടെ അത്യാഹിത സന്ദേശം. 

ജൂൺ 8-ന് ഒമാൻ ഉൾക്കടൽ മേഖലയിലൂടെ സഞ്ചരിച്ചിരുന്ന പാലാവു പതാകയിലുള്ള എണ്ണക്കപ്പൽ ആക്രമണത്തിൽ ഗുരുതരമായി കേടുപാടുകൾ സംഭവിച്ചതായാണ് റിപ്പോർട്ടുകൾ. തുടർന്ന് കപ്പലിൽ തീപിടിത്തമുണ്ടാവുകയും ജീവനക്കാർ അപകടാവസ്ഥയിലാകുകയും ചെയ്തു. കപ്പലിലുണ്ടായിരുന്ന 24 ഇന്ത്യൻ ജീവനക്കാർ അടിയന്തര സഹായം ആവശ്യപ്പെട്ട് സന്ദേശങ്ങൾ അയച്ചതായി റിപ്പോർട്ടുകളുണ്ട്. 

ആക്രമണത്തെ തുടർന്ന് കപ്പലിന്റെ അടിഭാഗത്ത് ദ്വാരമുണ്ടായതായും കടൽവെള്ളം അകത്തേക്ക് കയറുകയാണെന്നും ജീവനക്കാർ അറിയിച്ചിരുന്നു. സ്ഥിതി അതീവ ഗുരുതരമായതോടെയാണ് രക്ഷാപ്രവർത്തനത്തിനായി അടിയന്തര അഭ്യർഥന നടത്തിയത്. 

തുടർന്ന് ഒമാൻ അധികൃതരും വിവിധ രക്ഷാസംഘങ്ങളും ചേർന്ന് നടത്തിയ ദൗത്യത്തിൽ കപ്പലിലുണ്ടായിരുന്ന 24 ഇന്ത്യൻ ജീവനക്കാരെയും സുരക്ഷിതമായി രക്ഷപ്പെടുത്തി. ആർക്കും പരിക്കുകളോ ജീവഹാനിയോ സംഭവിച്ചിട്ടില്ലെന്ന് അധികൃതർ അറിയിച്ചു. 

സംഭവം പശ്ചിമേഷ്യൻ കടൽമേഖലയിലെ സുരക്ഷാ ആശങ്കകൾ വീണ്ടും ഉയർത്തിയിരിക്കുകയാണ്. ലോകത്തിലെ ഏറ്റവും തിരക്കേറിയ എണ്ണക്കടത്ത് പാതകളിലൊന്നായ ഈ മേഖലയിൽ വർധിച്ചുവരുന്ന സംഘർഷം വാണിജ്യ കപ്പൽഗതാഗതത്തിനും ഇന്ത്യൻ നാവികരുടെ സുരക്ഷയ്ക്കും വെല്ലുവിളിയാകുന്നതായാണ് വിലയിരുത്തൽ.