ബാലിയോളം വലിപ്പമുണ്ടായിരുന്ന ലോകത്തിലെ ഏറ്റവും വലിയ മഞ്ഞുമല 40 വർഷത്തിന് ശേഷം അപ്രത്യക്ഷമാകുന്നു

ഒരുകാലത്ത് ലോകത്തിലെ ഏറ്റവും വലിയ മഞ്ഞുമലയായിരുന്ന A23a ഏകദേശം 40 വർഷത്തെ യാത്രയ്ക്കൊടുവിൽ ഏതാണ്ട് പൂർണമായും ഉരുകി അപ്രത്യക്ഷമായി. 1986ൽ അന്റാർട്ടിക്കയിലെ ഫിൽഷ്നർ ഐസ് ഷെൽഫിൽ നിന്ന് വേർപെട്ട ഈ മഞ്ഞുമലയുടെ ഏറ്റവും വലിയ വിസ്തീർണം ഏകദേശം 2,000 ചതുരശ്ര മൈൽ — ബാലി ദ്വീപിന്റെ വലുപ്പത്തിന് സമാനമായിരുന്നു. 

വേർപെട്ടതിന് ശേഷം വർഷങ്ങളോളം വെഡൽ കടലിൽ കുടുങ്ങിക്കിടന്ന A23a 2020ലാണ് സഞ്ചരിക്കാൻ തുടങ്ങിയത്. 2023 നവംബറിൽ ഇത് തെക്കൻ സമുദ്രത്തിലെ തുറന്ന ജലത്തിലെത്തി. ഇതിനിടെ ശക്തമായ സമുദ്രധാരയിൽ കുടുങ്ങി മാസങ്ങളോളം ഒരേ സ്ഥലത്ത് ചുറ്റിക്കറങ്ങിയതും പിന്നീട് ചൂടേറിയ ജലത്തിലേക്ക് നീങ്ങിയതുമാണ് മഞ്ഞുരുകൽ വേഗത്തിലാക്കിയത്. 

2025 ജൂണോടെ A23aയുടെ വിസ്തീർണം 1,200 ചതുരശ്ര മൈലിൽ താഴെയായി. 2026 ജനുവരിയോടെ ഉപഗ്രഹദൃശ്യങ്ങളിൽ മഞ്ഞുമല നിരവധി ചെറിയ ഭാഗങ്ങളായി പിളരുന്നത് വ്യക്തമായി. മാർച്ചിൽ യുഎസ് നാഷണൽ ഐസ് സെന്റർ ഔദ്യോഗികമായി A23aയുടെ നിരീക്ഷണം അവസാനിപ്പിച്ചു; മഞ്ഞുമലയുടെ വലുപ്പം ഔദ്യോഗിക ട്രാക്കിങ് പരിധിക്ക് താഴെയെത്തിയിരുന്നു. 

A23a ഉരുകിപ്പോകുന്നതിനിടെ അതിന്റെ ചുറ്റുമുള്ള സമുദ്രത്തിൽ ഫൈറ്റോപ്ലാങ്ക്ടൺ വർധിച്ചതിന്റെ സൂചനകളും ഉപഗ്രഹങ്ങൾ കണ്ടെത്തി. മഞ്ഞുമലയിൽ നിന്നുള്ള ഉരുകിയ ശുദ്ധജലം സമുദ്രജീവവ്യവസ്ഥയിൽ സ്വാധീനം ചെലുത്തിയിരിക്കാമെന്നാണ് ശാസ്ത്രജ്ഞർ നിരീക്ഷിക്കുന്നത്.