ദേശീയ ടീമിനൊപ്പം ഇത് സാധ്യമല്ല; നെതർലൻഡ്സ് പരിശീലക സ്ഥാനം നിരസിച്ചതിന്റെ കാരണം വ്യക്തമാക്കി ആർനെ സ്ലോട്ട്
നെതർലൻഡ്സ് ദേശീയ ഫുട്ബോൾ ടീമിന്റെ പരിശീലക സ്ഥാനത്തേക്കുള്ള ക്ഷണം നിരസിച്ചതിന്റെ കാരണം വ്യക്തമാക്കി ആർനെ സ്ലോട്ട്. ദേശീയ ടീമിനേക്കാൾ ക്ലബ് ഫുട്ബോളിൽ തുടരാനാണ് നിലവിൽ തനിക്ക് താൽപര്യമെന്ന് സ്ലോട്ട് പറഞ്ഞു.
“കരിയറിന്റെ ഈ ഘട്ടത്തിൽ എല്ലാ ദിവസവും താരങ്ങൾക്കൊപ്പം പരിശീലന മൈതാനത്ത് ഉണ്ടാകാനാണ് ഞാൻ ആഗ്രഹിക്കുന്നത്. ദേശീയ ടീമിനൊപ്പം അത് ഒരേ രീതിയിൽ സാധ്യമല്ല,” സ്ലോട്ട് വ്യക്തമാക്കി.
നെതർലൻഡ്സ് ഫുട്ബോൾ അസോസിയേഷനായ KNVBയുമായി സ്ലോട്ട് ചർച്ച നടത്തിയിരുന്നു. എന്നാൽ ശമ്പളം, കരാർ കാലാവധി തുടങ്ങിയ കാര്യങ്ങളിലേക്ക് ചർച്ചകൾ എത്തിയിരുന്നില്ലെന്നും അദ്ദേഹം വ്യക്തമാക്കി. പ്രാഥമിക ചർച്ചകൾക്ക് പിന്നാലെ ഒരാഴ്ചയ്ക്കുള്ളിൽ തന്നെ ദേശീയ ടീമിന്റെ പരിശീലക സ്ഥാനത്തേക്ക് മുന്നോട്ട് പോകേണ്ടതില്ലെന്ന് തീരുമാനിക്കുകയായിരുന്നു.
രാജ്യത്തെ പരിശീലിപ്പിക്കുന്നത് ഭാവിയിൽ വലിയ ബഹുമതിയായിരിക്കുമെന്നും എന്നാൽ ഇപ്പോൾ ശരിയായ സമയമല്ലെന്നും സ്ലോട്ട് പറഞ്ഞു. ദേശീയ ടീമിനേക്കാൾ ക്ലബ് ഫുട്ബോളാണ് നിലവിൽ തന്റെ കരിയറിന് കൂടുതൽ അനുയോജ്യമെന്നും അദ്ദേഹം വ്യക്തമാക്കി.
