ട്രംപിന് വീണ്ടും ‘സ്റ്റീം’ വേണം; അമേരിക്കൻ നാവികസേനയിൽ ജെറ്റുകൾ വിക്ഷേപിക്കാൻ പഴയ സാങ്കേതികവിദ്യയിലേക്ക് മടക്കം

അമേരിക്കൻ നാവികസേനയുടെ പുതിയ വിമാനവാഹിനിക്കപ്പലുകളിൽ യുദ്ധവിമാനങ്ങൾ വിക്ഷേപിക്കാൻ ഉപയോഗിക്കുന്ന ആധുനിക ഇലക്ട്രോമാഗ്നറ്റിക് എയർക്രാഫ്റ്റ് ലോഞ്ച് സിസ്റ്റം (EMALS) ഒഴിവാക്കി പഴയ സ്റ്റീം കാറ്റപൾട്ട് സംവിധാനം തിരിച്ചുകൊണ്ടുവരാൻ പ്രസിഡന്റ് ഡോണൾഡ് ട്രംപ് നിർദേശം നൽകി. നിർമാണത്തിലിരിക്കുന്ന USS Doris Miller ഉൾപ്പെടെയുള്ള ഭാവിയിലെ ഫോർഡ് ക്ലാസ് വിമാനവാഹിനിക്കപ്പലുകളെയാണ് തീരുമാനം ബാധിക്കുക. 

വിമാനവാഹിനിക്കപ്പലിന്റെ ഡെക്കിൽ നിന്ന് യുദ്ധവിമാനങ്ങളെ അതിവേഗം ഉയർത്തിവിടുന്നതിനാണ് കാറ്റപൾട്ട് സംവിധാനം ഉപയോഗിക്കുന്നത്. പഴയ സ്റ്റീം സംവിധാനത്തിൽ ഉയർന്ന മർദത്തിലുള്ള നീരാവിയാണ് വിമാനത്തെ മുന്നോട്ട് തള്ളുന്നത്. EMALS-ൽ വൈദ്യുതകാന്തിക ശക്തിയാണ് ഉപയോഗിക്കുന്നത്. കൂടുതൽ കൃത്യതയോടെ വിവിധ ഭാരത്തിലുള്ള വിമാനങ്ങളെ വിക്ഷേപിക്കാനും കുറഞ്ഞ ജീവനക്കാരെ ഉപയോഗിച്ച് പ്രവർത്തിപ്പിക്കാനും EMALS-ന് കഴിയുമെന്നാണ് യുഎസ് നാവികസേന നേരത്തെ വ്യക്തമാക്കിയിരുന്നത്. 

എന്തുകൊണ്ടാണ് ട്രംപ് പഴയ സംവിധാനത്തിലേക്ക് മടങ്ങുന്നത്?

EMALS വളരെ സങ്കീർണമാണെന്നും ചെലവേറിയതാണെന്നും വിശ്വാസ്യത സംബന്ധിച്ച് ആശങ്കകളുണ്ടെന്നും ട്രംപ് നേരത്തെയും വിമർശിച്ചിരുന്നു. സ്റ്റീം കാറ്റപൾട്ട് വർഷങ്ങളായി ഉപയോഗിച്ചുവരുന്നതും യുദ്ധസാഹചര്യങ്ങളിൽ പരീക്ഷിക്കപ്പെട്ട സാങ്കേതികവിദ്യയുമാണെന്നാണ് അദ്ദേഹത്തിന്റെ നിലപാട്. സ്റ്റീം, ഹൈഡ്രോളിക് സംവിധാനങ്ങൾ കൂടുതൽ ‘battle-tested’ ആണെന്നും പരിപാലിക്കാൻ എളുപ്പമാണെന്നും ഭരണകൂടം വാദിക്കുന്നു. 

എന്നാൽ തീരുമാനത്തിനെതിരെ വിമർശനങ്ങളും ശക്തമാണ്. EMALS ഒഴിവാക്കി സ്റ്റീം സംവിധാനം സ്ഥാപിക്കുന്നത് ഇതിനകം രൂപകൽപ്പന ചെയ്ത കപ്പലിൽ വലിയ മാറ്റങ്ങൾ വരുത്തേണ്ട സാഹചര്യമുണ്ടാക്കും. USS Doris Miller-ന്റെ EMALS നിർമാണം ഏകദേശം 50 ശതമാനം പൂർത്തിയായ ഘട്ടത്തിലാണ് മാറ്റത്തിനുള്ള നിർദേശം വന്നത്. ഇതോടെ അധിക ചെലവും നിർമാണ കാലതാമസവും സാങ്കേതിക ഏകീകരണ പ്രശ്നങ്ങളും ഉണ്ടാകാമെന്ന് EMALS നിർമാതാക്കളായ ജനറൽ ആറ്റോമിക്സ് മുന്നറിയിപ്പ് നൽകി. 

‘എന്തിന് പിന്നോട്ടുപോകുന്നു?’

ഇതാണ് തീരുമാനത്തിലെ പ്രധാന ചോദ്യം. EMALS തിരഞ്ഞെടുക്കാനുള്ള പ്രധാന കാരണങ്ങളിൽ കുറഞ്ഞ പരിപാലനച്ചെലവ്, കുറഞ്ഞ ജീവനക്കാരുടെ ആവശ്യം, കൂടുതൽ കൃത്യത, ഭാവിയിലെ വിവിധ തരത്തിലുള്ള വിമാനങ്ങൾ വിക്ഷേപിക്കാനുള്ള ശേഷി എന്നിവ ഉൾപ്പെട്ടിരുന്നു. യുഎസ് നാവികസേനയുടെ കണക്കുകൾ പ്രകാരം USS Gerald R. Ford-ൽ മാത്രം 2026 മാർച്ച് വരെ 36,863 EMALS വിക്ഷേപണങ്ങൾ പൂർത്തിയാക്കിയിട്ടുണ്ട്. 

അതേസമയം, സ്റ്റീം സംവിധാനത്തിലേക്ക് മടങ്ങുന്നത് കൂടുതൽ ജീവനക്കാരെ ആവശ്യപ്പെടുകയും പരിപാലനം സങ്കീർണമാക്കുകയും ചെയ്യുമെന്ന് വിമർശകർ ചൂണ്ടിക്കാട്ടുന്നു. ചൈനയും ഫ്രാൻസും ഉൾപ്പെടെയുള്ള രാജ്യങ്ങൾ ഇലക്ട്രോമാഗ്നറ്റിക് വിക്ഷേപണ സാങ്കേതികവിദ്യയിലേക്ക് നീങ്ങുന്ന സമയത്താണ് അമേരിക്ക പഴയ സംവിധാനത്തിലേക്ക് മടങ്ങുന്നതെന്നതും ചർച്ചയാകുന്നു. 

ട്രംപിന്റെ നിർദേശപ്രകാരം പ്രതിരോധ വകുപ്പും നാവികസേനയും 60 ദിവസത്തിനകം EMALS, ഇലക്ട്രോമാഗ്നറ്റിക് ആയുധ ലിഫ്റ്റുകൾ എന്നിവ മാറ്റി സ്റ്റീം, ഹൈഡ്രോളിക് സംവിധാനങ്ങൾ ഉപയോഗിക്കുന്നതിനുള്ള പദ്ധതി സമർപ്പിക്കണം.