അമേരിക്കയുടെ ദേശീയ കടം 40 ട്രില്യൺ ഡോളർ കടന്നു; ഇറാനെതിരായ ട്രംപിന്റെ സമ്മർദം സാമ്പത്തിക ആശങ്ക വർധിപ്പിക്കുന്നു

വാഷിങ്ടൺ: അമേരിക്കയുടെ ദേശീയ കടം ചരിത്രത്തിലാദ്യമായി 40 ട്രില്യൺ ഡോളർ കടന്നു. ഓഗസ്റ്റ് 19ന് ട്രഷറി പുറത്തുവിട്ട കണക്കുകൾ പ്രകാരം മൊത്തം കടം 40.047 ട്രില്യൺ ഡോളറിലെത്തി. ഇതിൽ 32.266 ട്രില്യൺ ഡോളർ പൊതുജനങ്ങളുടെ കൈവശമുള്ള കടവും 7.782 ട്രില്യൺ ഡോളർ സർക്കാർ സ്ഥാപനങ്ങൾ തമ്മിലുള്ള കടബാധ്യതയുമാണ്. 

പ്രതിരോധം, സോഷ്യൽ സെക്യൂരിറ്റി, മെഡികെയർ തുടങ്ങിയ മേഖലകളിലെ ഉയർന്ന ചെലവുകളും വർധിച്ച പലിശച്ചെലവും കടം ഉയരാൻ പ്രധാന കാരണങ്ങളാണ്. 2026 സാമ്പത്തിക വർഷം ജൂലൈ അവസാനിക്കുമ്പോഴേക്കും അമേരിക്കയുടെ ബജറ്റ് കമ്മി 1.8 ട്രില്യൺ ഡോളറായി. 

ഇതിനിടെ ഇറാനെതിരായ ട്രംപ് ഭരണകൂടത്തിന്റെ കടുത്ത സാമ്പത്തിക സമ്മർദവും വിപണിയിൽ ആശങ്ക വർധിപ്പിക്കുന്നുണ്ട്. ഇറാനെതിരെ കൂടുതൽ ശക്തമായ സാമ്പത്തിക നടപടികൾ സ്വീകരിക്കുമെന്ന് ട്രംപ് പ്രഖ്യാപിച്ചിട്ടുണ്ട്. ഇറാൻ സംഘർഷവും എണ്ണവില ഉയരാനുള്ള സാധ്യതയും പണപ്പെരുപ്പ ഭീഷണിയും അമേരിക്കയുടെ സാമ്പത്തിക സമ്മർദം കൂടുതൽ ശക്തമാക്കുന്ന ഘടകങ്ങളാണ്. 

അമേരിക്കൻ സർക്കാർ കടം നിയന്ത്രിക്കാനും സാമ്പത്തിക വളർച്ച വേഗത്തിലാക്കാനും നടപടികൾ സ്വീകരിക്കുന്നതായി വൈറ്റ് ഹൗസ് വ്യക്തമാക്കുന്നുണ്ടെങ്കിലും, ഉയർന്ന പലിശനിരക്കും വർധിക്കുന്ന കടബാധ്യതയും ദീർഘകാല സാമ്പത്തിക വെല്ലുവിളിയായി തുടരുകയാണ്.