ജി20 യോഗത്തിൽ ചില മാധ്യമപ്രവർത്തകർക്ക് പ്രവേശനം നിഷേധിച്ച് യുഎസ് ട്രഷറി; കാരണം വ്യക്തമാക്കിയില്ല

അമേരിക്കയിലെ ആഷ്‌വില്ലിൽ നടക്കുന്ന ജി20 ധനമന്ത്രിമാരുടെ യോഗം റിപ്പോർട്ട് ചെയ്യാനെത്തിയ ചില മാധ്യമപ്രവർത്തകർക്ക് യുഎസ് ട്രഷറി വകുപ്പ് പ്രവേശനാനുമതി നൽകിയില്ല. ന്യൂയോർക്ക് ടൈംസ്, വാൾ സ്ട്രീറ്റ് ജേണൽ, ബ്ലൂംബെർഗ് ന്യൂസ് എന്നിവിടങ്ങളിൽ നിന്നുള്ള ചില റിപ്പോർട്ടർമാരുടെ അക്രഡിറ്റേഷൻ അപേക്ഷകളാണ് നിരസിച്ചത്. 

ന്യൂയോർക്ക് ടൈംസ് റിപ്പോർട്ടർ അലൻ റാപ്പപോർട്ടിനും പ്രവേശനം നിഷേധിക്കപ്പെട്ടു. 2017 മുതൽ ട്രഷറി വകുപ്പും ഇത്തരം യോഗങ്ങളും റിപ്പോർട്ട് ചെയ്തുവരുന്ന മാധ്യമപ്രവർത്തകനാണ് അദ്ദേഹം. അതേസമയം, അതേ പത്രത്തിലെ ബെർലിൻ ബ്യൂറോ ചീഫ് ജിം ടാങ്കേഴ്സ്ലിക്ക് യോഗത്തിൽ പങ്കെടുക്കാൻ അനുമതി ലഭിച്ചു. 

അക്രഡിറ്റേഷൻ നിഷേധിച്ചതിന്റെ കാരണം ട്രഷറി വകുപ്പ് വ്യക്തമാക്കിയിട്ടില്ല. എന്നാൽ മാധ്യമപ്രവർത്തകരുടെ കാഴ്ചപ്പാടുകളുമായി തീരുമാനത്തിന് ബന്ധമില്ലെന്ന് യുഎസ് ട്രഷറി സെക്രട്ടറി സ്കോട്ട് ബെസന്റ് അസോസിയേറ്റഡ് പ്രസ്സിനോട് പറഞ്ഞു. 

മാധ്യമപ്രവർത്തകർക്ക് പ്രവേശനം നിഷേധിച്ചത് മാധ്യമസ്വാതന്ത്ര്യത്തെയും പൊതുജനങ്ങളുടെ വിവരാവകാശത്തെയും ബാധിക്കുന്ന നടപടിയാണെന്ന് ന്യൂയോർക്ക് ടൈംസ് വിമർശിച്ചു. ജി20 യോഗത്തിന്റെ അജൻഡയിൽ ഇറാനിലെ യുദ്ധം, ഉപരോധങ്ങൾ, ബോണ്ട് വിപണി, പണപ്പെരുപ്പം തുടങ്ങിയ പ്രധാന വിഷയങ്ങളുണ്ട്. 

ട്രംപ് ഭരണകൂടവും യുഎസ് മാധ്യമങ്ങളും തമ്മിലുള്ള സംഘർഷം വർധിക്കുന്നതിനിടെയാണ് പുതിയ സംഭവം.