വാഷിങ്ടണിന്റെ ആക്രമണ നയങ്ങൾ പരാജയപ്പെട്ടു; അമേരിക്കയ്ക്ക് വീണ്ടും മുന്നറിയിപ്പുമായി ഇറാൻ
ടെഹ്‌റാൻ: അമേരിക്കയുടെ ആക്രമണ നയങ്ങളും പരമാവധി സമ്മർദ തന്ത്രങ്ങളും പരാജയപ്പെട്ടെന്ന് ഇറാൻ. അമേരിക്കയെ ലക്ഷ്യമിട്ട് വീണ്ടും മുന്നറിയിപ്പുമായി ഇറാൻ സായുധസേനാ വക്താവ് ബ്രിഗേഡിയർ ജനറൽ ഷെകാർച്ചി രംഗത്തെത്തി. ഇറാന്റെ ജനതയുടെയും നേതൃത്വത്തിന്റെയും സായുധസേനയുടെയും ഇച്ഛാശക്തിയെ തകർക്കാൻ അമേരിക്കയ്ക്ക് കഴിഞ്ഞിട്ടില്ലെന്നും അദ്ദേഹം അവകാശപ്പെട്ടു.
അമേരിക്കയിലെ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കുണ്ടായ തിരിച്ചടികൾ ഇറാനെ കീഴ്പ്പെടുത്താനുള്ള വാഷിങ്ടണിന്റെ ശ്രമങ്ങൾ പരാജയപ്പെട്ടതിന്റെ സൂചനയാണെന്ന് ഷെകാർച്ചി പറഞ്ഞു. വധശ്രമങ്ങൾ, സൈനിക നീക്കങ്ങൾ, പരമാവധി സാമ്പത്തിക സമ്മർദം തുടങ്ങിയ തന്ത്രങ്ങളൊന്നും ഇറാന്റെ പ്രതിരോധശേഷിക്ക് മുന്നിൽ വിജയിച്ചിട്ടില്ലെന്നും അദ്ദേഹം വ്യക്തമാക്കി.
ഇതിനിടെ മേഖലയിലെ അമേരിക്കൻ സൈനിക സാന്നിധ്യത്തിനെതിരെയും ഇറാൻ മുന്നറിയിപ്പ് നൽകി. ഇറാൻ സായുധസേനകൾ തമ്മിലുള്ള ഏകോപനം ഏറ്റവും ഉയർന്ന നിലയിലാണെന്നും രാജ്യത്തിന്റെ സമുദ്രാതിർത്തികൾ സംരക്ഷിക്കാൻ നാവികസേന സദാ സജ്ജമാണെന്നും വടക്കൻ നാവികസേനാ കമാൻഡർ റിയർ അഡ്മിറൽ മൊഹ്സെൻ റസാഖി പറഞ്ഞു.
ഇറാനെതിരായ ഏതൊരു ആക്രമണത്തിനും കനത്ത വില നൽകേണ്ടിവരുമെന്നും ശത്രുവിന് വീണ്ടും ആക്രമിക്കാൻ കഴിയാത്തവിധം പ്രതിരോധം ശക്തമാക്കുമെന്നും അദ്ദേഹം മുന്നറിയിപ്പ് നൽകി. ഇറാന്റെ നാവിക, മിസൈൽ, ഡ്രോൺ ശേഷികളും ഭൗമശാസ്ത്രപരമായ തന്ത്രപ്രധാന സ്ഥാനവും രാജ്യത്തിന്റെ പ്രതിരോധത്തിന്റെ പ്രധാന ഘടകങ്ങളാണെന്നും അദ്ദേഹം കൂട്ടിച്ചേർത്തു.
ഇറാന്റെ ആയുധ വിതരണ ശൃംഖലകൾ തടസ്സപ്പെടുത്തുന്നതിനായി പുതിയ ദൗത്യസംഘം രൂപീകരിച്ചതായി അമേരിക്കൻ സെൻട്രൽ കമാൻഡ് പ്രഖ്യാപിച്ചതിന് പിന്നാലെയാണ് ഇറാന്റെ പുതിയ പ്രതികരണം. ഇരുരാജ്യങ്ങളും തമ്മിലുള്ള സംഘർഷം വീണ്ടും രൂക്ഷമാകാനുള്ള സാധ്യത നിലനിൽക്കുന്നതിനിടെ പശ്ചിമേഷ്യയിലെ സ്ഥിതിഗതികൾ അന്താരാഷ്ട്ര തലത്തിൽ ആശങ്കയുണ്ടാക്കുകയാണ്.
