ഹാലൻഡിന്റെ പുതിയ ഹെയർകട്ട് കണ്ട് ഞെട്ടി സ്ലാട്ടൻ; പ്രതികരണം വൈറൽ

മാഞ്ചസ്റ്റർ സിറ്റി താരം എർലിങ് ഹാലൻഡ് തന്റെ നീണ്ട സ്വർണനിറമുള്ള മുടി മുറിച്ച് പുതിയ ബസ് കട്ട് ലുക്കിലെത്തിയതോടെ ഫുട്ബോൾ ലോകത്ത് ചർച്ച. പുതിയ സീസണിന് മുന്നോടിയായാണ് ഹാലൻഡ് തന്റെ പതിവ് ലുക്ക് മാറ്റിയത്.

പുതിയ ഹെയർകട്ട് സുഹൃത്തുക്കളെയും മുൻ സഹതാരങ്ങളെയും വീഡിയോ കോളിലൂടെ കാണിച്ച് അവരുടെ പ്രതികരണം അറിയുകയായിരുന്നു ഹാലൻഡ്. മുൻ മാഞ്ചസ്റ്റർ സിറ്റി പരിശീലകൻ പെപ് ഗ്വാർഡിയോള, ജാക്ക് ഗ്രീലിഷ്, സ്ലാട്ടൻ ഇബ്രാഹിമോവിച്ച് എന്നിവരോടും പുതിയ ലുക്ക് കാണിച്ചു.

ഹാലൻഡിന്റെ പുതിയ രൂപം കണ്ട സ്ലാട്ടന്റെ പ്രതികരണമാണ് സോഷ്യൽ മീഡിയയിൽ ഏറ്റവും കൂടുതൽ ശ്രദ്ധ നേടിയത്. അപ്രതീക്ഷിതമായ മാറ്റം കണ്ട് സ്ലാട്ടൻ ഞെട്ടി. ‘എന്താണ് നീ ചെയ്തത്?’ എന്ന അർഥത്തിലുള്ള രൂക്ഷമായ പ്രതികരണത്തോടൊപ്പം ഹാലൻഡ് വാതുവെപ്പിൽ തോറ്റോ എന്നും തമാശയായി ചോദിച്ചു.

ഹാലൻഡിന്റെ നീണ്ട മുടിയുമായി ബന്ധപ്പെട്ട് നേരത്തെ സ്ലാട്ടൻ നൽകിയ ഉപദേശവും ശ്രദ്ധേയമാണ്. മുടി മുറിക്കരുതെന്നും ശക്തി മുടിയിലാണെന്നുമായിരുന്നു സ്ലാട്ടന്റെ തമാശ കലർന്ന ഉപദേശം. അതുകൊണ്ടുതന്നെ ഹാലൻഡ് മുടി മുറിച്ചതിലുള്ള സ്ലാട്ടന്റെ പ്രതികരണത്തിന് ആരാധകർക്കിടയിൽ കൂടുതൽ കൗതുകമായി.

പെപ് ഗ്വാർഡിയോളയും ഹാലൻഡിന്റെ പുതിയ ലുക്കിനോട് രസകരമായ രീതിയിലാണ് പ്രതികരിച്ചത്. മുടിയുണ്ടെന്നതിൽ ഹാലൻഡ് ഭാഗ്യവാനാണെന്നും തനിക്ക് അതുണ്ടായിരുന്നെങ്കിൽ സന്തോഷമായേനെയെന്നും ഗ്വാർഡിയോള തമാശയായി പറഞ്ഞു. ജാക്ക് ഗ്രീലിഷ് ഹാലൻഡിന് ഇപ്പോൾ പത്ത് വയസ്സുകാരനെപ്പോലെയാണ് തോന്നുന്നതെന്നും പരിഹസിച്ചു.

ഹാലൻഡിന്റെ പുതിയ ബസ് കട്ട് സോഷ്യൽ മീഡിയയിലും വേഗത്തിൽ വൈറലായി. വർഷങ്ങളായി താരത്തിന്റെ തിരിച്ചറിയൽ ചിഹ്നമായിരുന്ന നീണ്ട മുടി ഒഴിവാക്കി പുതിയ സീസണിൽ പൂർണമായും വ്യത്യസ്തമായ ലുക്കിലാണ് താരം എത്തുന്നത്.